अलिबाग(प्रतिनिधी): जे.एस.एम. महाविद्यालयाच्या राष्ट्रीय सेवा योजना विभागाच्या सात दिवसीय श्रमसंस्कार विशेष निवासी शिबिराला मौजे सारळ येथे सुरुवात झाली. उद्घाटन प्रसंगी प्राचार्या डॉ. सोनाली पाटील यांनी एनएसएस शिबीर हे विद्यार्थ्यांच्या स्वावलंबन व व्यक्तिमत्व विकासाचे प्रभावी माध्यम असल्याचे सांगितले.
जनता शिक्षण मंडळाचे अध्यक्ष ॲड. गौतमभाई पाटील व उपाध्यक्षा डॉ. साक्षी पाटील यांनी शिबिरार्थींना शुभेच्छा दिल्या. प्रमुख पाहुण्या म्हणून सारळच्या माजी सरपंच ॲड. अमृता नाईक उपस्थित होत्या.
उपप्राचार्य व कार्यक्रम अधिकारी डॉ. प्रविण गायकवाड यांनी शिबिराचा उद्देश व उपक्रमांची माहिती दिली. प्राचार्या डॉ. पाटील यांनी विद्यार्थ्यांना सामाजिक व सांस्कृतिक उपक्रमात सक्रिय सहभागाचे आवाहन केले.
कार्यक्रमाचे सूत्रसंचालन व आभारप्रदर्शन प्रा. अश्विनी आठवले यांनी केले.
