रायगड (प्रतिनिधी):अलिबागमध्ये पोलीस पाटीलांची बनावट नावे टाकून मानधनाच्या बिलात फेरफार करण्याचा प्रताप समोर आला आहे. यामध्ये पावणे २ कोटी रुपयांचा भ्रष्टाचार झाल्याचे समोर आले आहे. पोलीस अधीक्षक कार्यालयातील लेखा शाखेतील कनिष्ठ लिपिकांसह चौघांविरोधात गुन्हा दाखल करण्यात आला आहे. मिळालेल्या माहितीनुसार, आरोपी राजेश राम जाधव हे पोलीस अधीक्षक कार्यालयातील लेखा शाखा विभागात कनिष्ठ लिपीक म्हणून कार्यरत आहेत. त्यांनी 2021 पासून ते आजतागायत जिल्ह्यातील पोलीस पाटील यांची यादी बनवून त्यामध्ये प्रत्यक्ष हजर नसलेल्या पोलीस पाटलांची बनावट नावे टाकून बनावट देयक तयार केले. त्यानंतर पोलीस पाटील यांची दरमहा मानधनाची मंजुरी कोषागारातून प्राप्त करून घेतली. त्यानंतर पुन्हा या यादीमध्ये फेरफार करून दुसरी बनावट यादी तयार करून स्वतःच्या नावे ७२ लाख ३२ हजार ५०० रुपये, तसेच रिया राजेश जाधव या पोलीस पाटील नसताना त्यांच्या नावाचा मुदतवाढीचा खोटा दाखला बनवून त्यांच्या नावाने १ कोटी ५ लाख ९६ हजार रुपयांची रक्कम कोषागारातून काढली. या प्रकरणात एकूण १ कोटी ७८ लाख २९ हजार रुपयांचा अपहार झाल्याचे उघड झाले आहे. याप्रकरणी राजेश जाधव, रिया जाधव व इतर दोन अशा एकूण चौघांविरोधात अलिबाग पोलीस ठाण्यात गुन्हा दाखल करण्यात आला आहे.
