मुंबई (धनश्री रेवडेकर): मुंबई महानगरपालिका सार्वत्रिक निवडणूक २०२५–२६ च्या कामकाजादरम्यान गंभीर स्वरूपाचे गैरवर्तन करून निवडणूक प्रक्रियेत अडथळा निर्माण केल्याप्रकरणी महापालिकेच्या एका अधिकाऱ्याला निलंबित करण्यात आले आहे. महापालिकेच्या अतिरिक्त आयुक्त (शहर) डॉ. अश्विनी जोशी यांनी या संदर्भात तात्काळ प्रभावाने निलंबनाचे आदेश दिले आहेत.
निलंबित करण्यात आलेल्या अधिकाऱ्याचे नाव दीपक जोहरे असून ते मुंबई महानगरपालिकेच्या वित्त विभागात कनिष्ठ लेखापरीक्षक म्हणून कार्यरत आहेत. महानगरपालिका सार्वत्रिक निवडणुकीसाठी त्यांची नियुक्ती मध्यवर्ती निवडणूक कार्यालयात (आर. ओ.) करण्यात आली होती.
निवडणूक कामकाज सुरू असताना जोहरे यांनी अत्यंत गंभीर स्वरूपाचे गैरवर्तन केल्याची तक्रार महापालिका प्रशासनाला प्राप्त झाली होती. या तक्रारीसोबत सबळ पुरावेही सादर करण्यात आले होते. त्यानंतर करण्यात आलेल्या प्राथमिक चौकशीत निवडणूक प्रक्रियेत बाधा पोहोचविणारे वर्तन झाल्याचे प्रथमदर्शनी निष्पन्न झाले. या पार्श्वभूमीवर अतिरिक्त महानगरपालिका आयुक्त (शहर) डॉ. अश्विनी जोशी यांनी जोहरे यांचे तात्काळ निलंबन करण्याचे आदेश दिले.
मुंबई महानगरपालिका सार्वत्रिक निवडणूक ही माननीय राज्य निवडणूक आयोगाच्या मार्गदर्शक तत्त्वांनुसार अत्यंत निष्पक्ष, पारदर्शक आणि शिस्तबद्ध वातावरणात पार पडत आहे. या निवडणूक प्रक्रियेच्या यशस्वी अंमलबजावणीसाठी महापालिकेची संपूर्ण प्रशासकीय यंत्रणा अहोरात्र कार्यरत आहे.
दरम्यान, निवडणूक प्रक्रियेच्या कामकाजात कोणत्याही कर्मचाऱ्याने शिस्तभंग करणारे किंवा प्रक्रियेत अडथळा निर्माण करणारे वर्तन केल्यास त्यांच्यावर कठोर कारवाई केली जाईल, असे स्पष्ट आणि सक्त निर्देश अतिरिक्त आयुक्त (शहर) डॉ. अश्विनी जोशी यांनी दिले आहेत.
