अलिबाग (प्रतिनिधी): अलिबागमधील जिल्हा रुग्णालय येथे गुरुवारी ता. 15 अरुणोदय सिकलसेल अॅनिमिया विशेष अभियानाचा शुभारंभ करण्यात आला. या वेळी जिल्हा शल्यचिकित्सक डॉ. निशिकांत पाटील, अतिरिक्त जिल्हा शल्य चिकित्सक डॉ. शीतल जोशी, निवासी वैद्यकीय अधिकारी डॉ. किरण शिंदे, जिल्हा आरोग्य अधिकारी डाॅ. आनंद गोसावी, प्रशासकीय अधिकारी डॉ. प्रवीण कांदडे, अस्थिव्यंग तज्ज्ञ डॉ. आशिष मिश्रा, अधिसेविका गायत्री म्हात्रे, सहा. अधिसेविका अनिता भोपी आदी मान्यवर उपस्थित होते. जिल्ह्यातील सर्व प्राथमिक आरोग्य केंद्रे, उपकेंद्र, उपजिल्हा रुग्णालय, ग्रामीण रुग्णालय व तालुका आरोग्य कार्यालयात या तपासणी शिबिराचा शुभारंभ करण्यात आला आहे.
जिल्हा आरोग्य अधिकारी डॉ. आनंद गोसावी यांच्या मार्गदर्शनाखाली तसेच जिल्हा शल्य चिकित्सक डॉ. निशिकांत पाटील यांच्या नेतृत्वाखाली 15 जानेवारी ते 7 फेब्रुवारीदरम्यान सिकलसेल अॅनिमिया विशेष अभियान राबविण्यात येत आहे. अभियानादरम्यान 0 ते 40 वर्षावरील नागरिकांची प्राथमिक तपासणी करण्यात येणार आहे. रायगड जिल्हा परिषद आरोग्य विभागामार्फत एकूण 55 प्राथमिक आरोग्य केंद्रे, त्यांच्या अंतर्गत 280 प्राथमिक आरोग्य उपकेंद्रे, 6 उपजिल्हा रुग्णालय, 8 ग्रामीण रुग्णालयात व 15 तालुका आरोग्य कार्यालयात ही तपासणी करण्यात येणार आहे. या अभियानासाठी जिल्हयामध्ये आरोय विभागाच्या 297 पथके सिकलसेल सव्र्हेक्षण करणार आहेत.
*********
सिकलसेलमुक्त रायगड जिल्हा करण्यासाठी सर्व नागरिकांनी या मोहिमेत उत्स्फूर्त सहभाग घ्यावा. विशेषतः तरुणांनी तपासणी करून घेऊन प्रशासनास सहकार्य करावे व रायगड जिल्हा सिकलसेल अॅनिमिया मुक्त करावा असे आवाहन रायगड जिल्हा परिषदेच्या मुख्य कार्यकारी अधिकारी नेहा भोसले यांनी केले आहे.
*********
तपासणी शिबिराच्या पहिल्या दिवशी अलिबाग जिल्हा रुग्णालयात 21 जणांची तपासणी करण्यात आली असून सर्वांची तपासणी निगेटिव्ह आली आहे.
