रायगड (प्रतिनिधी): रायगड जिल्ह्यातील पेण–खोपोली मार्गावर असलेल्या एचपी इंटरनॅशनल कंपनीत आज अचानक भीषण आग लागल्याची घटना घडली आहे. ही कंपनी नारंगी गावाच्या शेजारी असून आगीमुळे परिसरात एकच खळबळ उडाली आहे.
मिळालेल्या प्राथमिक माहितीनुसार, कंपनीतील प्लास्टिक व ज्वलनशील कच्चा माल असल्यामुळे आग अतिशय वेगाने भडकली. आगीच्या तीव्रतेमुळे कच्च्या मालाचे ड्रम एकामागोमाग एक फुटत असून मोठ्या प्रमाणात स्फोट होत असल्याचे चित्र आहे. त्यामुळे आगीवर नियंत्रण मिळवणे अग्निशमन दलासाठी मोठे आव्हान ठरत आहे.
आगीच्या उंच ज्वाळा आणि काळ्या धुराचे लोट दूरवर पसरले असून संपूर्ण परिसर धुराने व्यापला आहे. खबरदारीचा उपाय म्हणून परिसरातील नागरिकांना सतर्क राहण्याचे आवाहन करण्यात आले आहे.
या आगीत कंपनीचे मोठ्या प्रमाणात आर्थिक नुकसान झाल्याचा अंदाज व्यक्त केला जात आहे. सुदैवाने, आतापर्यंत कोणतीही जीवितहानी झाल्याचे वृत्त नाही, अशी माहिती प्रशासनाकडून देण्यात आली आहे.
घटनेची माहिती मिळताच पाताळगंगा एमआयडीसीसह आसपासच्या औद्योगिक परिसरातील अनेक कंपन्यांचे अग्निशमन दल तात्काळ घटनास्थळी दाखल झाले आहे. आगीवर नियंत्रण मिळवण्यासाठी शर्थीचे प्रयत्न सुरू असून अतिरिक्त पाण्याचे टँकर आणि आवश्यक यंत्रसामग्री मागवण्यात आली आहे.
आगीचे नेमके कारण अद्याप स्पष्ट झालेले नाही. आग आटोक्यात आल्यानंतर कारणांचा तपास करण्यात येणार असल्याचे संबंधित अधिकाऱ्यांनी सांगितले आहे. प्रशासन परिस्थितीवर बारकाईने लक्ष ठेवून असून पुढील माहितीची प्रतीक्षा आहे.
