अलिबाग रायगड:उन्हाळी सुट्टीत पर्यटक अलिबाग वरसोली समुद्राचा आनंद घेत असताना येथील माशांवरही ताव मारत आहेत. त्यामुळे मच्छीमार बांधवांना, हॉटेल व्यावसायिक, समुद्र किनाऱ्यावरील बोटिंग, घोडे व्यावसायिक यांचे धंदेही तेजीत आहेत.
उन्हाळ्याची सुट्टी लागल्याने पर्यटक मोठ्या संख्येने जिल्ह्यातील समुद्र किनाऱ्यांवर येत असल्याचे दिसत आहे. पर्यटक पर्यटनासाठी आले असल्याने समुद्र किनारे तसेच हॉटेल्स, रिसॉर्ट, लॉजेस हाऊसफुल झालेली आहेत. लहानग्यांपासून ते मोठ्यांपर्यत समुद्रात पोहण्याचा आनंद घेताना पर्यटक दिसत आहेत.
मुलांना सुट्टी लागलेली आहे. त्यामुळे पालकवर्ग पर्यटनाचे बेत आखत आहेत. पर्यटक हे पर्यटनासाठी पहिली पसंती अलिबाग , वरसोली, आदी ठिकाणांना देत असल्याने जिल्ह्यात सध्या पर्यटकांचा राबता दिसत आहे.
जिल्ह्यात अलिबाग, वरसोली, नागाव, आक्षी, काशीद, मुरुड, दिवेआगर, श्रीवर्धन, हरिहरेश्वर या समुद्र किनारी पर्यटक आलेले आहेत.
