अलिबाग रायगड:रायगड जिल्ह्यात अनेक तालुक्यात पावसाने जोरदार हजेरी लावल्याने काहीसा दिलासा मिळाला आहे. ६ मेलाच रायगड जिल्ह्यात पावसाने तुरळक हजेरी लावली होती. गेले काही दिवस वातावरणातील उष्म्याचे प्रमाण आणखी वाढले होते. मंगळवारी बराच वेळ अलिबाग, पेण , रोहा श्रीवर्धन, मुरूड, माणगाव, महाड, पोलादपूर तालुक्यात विजांच्या कडकडाटासह पावसाने जोरदार हजेरी लावल्याने हवेत गारवा निर्माण झाला आहे. रायगड जिल्ह्याच्या काही भागात पावसाच्या जोरदार तर काही ठिकाणी मध्यम सरी कोसळत आहेत, कोलाड, माणगाव, इंदापूर, नागोठणे, रोहा, उरण पेण भागात पावसाचा जोर अधिक आहे. अलिबाग, मुरुड या किनारपट्टीच्या भागात पाऊस किरकोळ स्वरूपाचा आहे. जिल्ह्याच्या सर्वच भागात दाट ढगाळ वातावरण आहे. हवामान खात्याने पुढील २४ तासांत रायगड जिल्ह्यात काही ठिकाणी विजांच्या कडकडाटासह वादळ, हलक्या ते मध्यम पावसासह जोरदार वारे (४०-५० किमी प्रतितास) होण्याची शक्यता आहे. नागरिकांनी सतर्क राहावे असे आवाहन जिल्हा आपत्ती व्यवस्थापन विभागाने केले आहे.
