अलिबाग (प्रतिनिधी): माजी आमदार पंडितशेठ पाटील यांनी रायगड जिल्ह्यातील विविध प्रलंबित प्रश्न मार्गी लावण्यासाठी प्रशासनाशी महत्त्वपूर्ण बैठक घेतली. या निमित्ताने त्यांनी जिल्हाधिकारी किसन जावळे, पोलीस अधीक्षक आंचल दलाल तसेच जिल्हा परिषदेच्या मुख्य कार्यकारी अधिकारी नेहा भोसले यांची स्वतंत्रपणे भेट घेतली.
या बैठकीदरम्यान जिल्ह्यातील पायाभूत सुविधा, रस्त्यांची दुरुस्ती, पाणीपुरवठा, ग्रामविकास योजना तसेच कायदा व सुव्यवस्था यांसारख्या विविध विषयांवर सविस्तर चर्चा करण्यात आली. काही ठिकाणी सुरू असलेल्या विकासकामांमध्ये येणाऱ्या अडचणींबाबतही पाटील यांनी प्रशासनाचे लक्ष वेधले. संबंधित अधिकाऱ्यांनी या समस्या तातडीने सोडविण्याचे आश्वासन दिले.
पंडितशेठ पाटील यांनी ग्रामीण भागातील नागरिकांच्या अडचणी, शेतकऱ्यांचे प्रश्न आणि युवकांना रोजगाराच्या संधी निर्माण करण्याबाबतही विशेष आग्रह धरला. प्रशासनाने सकारात्मक प्रतिसाद देत काही महत्त्वाच्या कामांना तात्काळ मंजुरी देण्याची तयारी दर्शवली.
या बैठकीमुळे जिल्ह्यातील अनेक प्रलंबित कामांना गती मिळणार असून नागरिकांना दिलासा मिळेल, अशी अपेक्षा व्यक्त होत आहे. तसेच प्रशासन आणि लोकप्रतिनिधी यांच्यातील समन्वयामुळे विकासकामांना नवी दिशा मिळेल, असा विश्वासही व्यक्त केला जात आहे.
