अलिबाग – महाराष्ट्रातील रायगड जिल्ह्यातील हटाळे येथील जिल्हा परिषद शाळेचे सहाय्यक शिक्षक डॉ. संदीप दत्तात्रेय वारगे यांना त्यांच्या शिक्षण क्षेत्रातील लक्षणीय कार्यासाठी “मॅजिक बुक ऑफ रेकॉर्ड फाउंडेशन, हरियाणा” या संस्थेने मानद डॉक्टरेट पदवीने सन्मानित केले आहे. हा सन्मान त्यांना १५० उपग्रह निर्मिती व प्रक्षेपण राष्ट्रीय मोहिमेत विद्यार्थ्यांचा सहभाग घडवून आणल्याबद्दल आणि शिक्षणात तंत्रज्ञानाच्या प्रभावी वापरासाठी बहाल करण्यात आला.
वारगे सरांचे एकूण ३० वर्षांचे शिक्षक म्हणून कार्य असून त्यांनी हटाळे शाळेत बदली झाल्यानंतर शाळेच्या पायाभूत सुविधा बदलून टाकल्या. त्यांनी विज्ञान प्रयोगशाळा, ग्रंथालय, ऑनलाईन ओलॅब, लॅपटॉपसह स्मार्ट शिक्षण तंत्रज्ञान विद्यार्थ्यांच्या हाती दिले. विशेषतः आदिवासी विद्यार्थ्यांसाठी पहिली डिजिटल शाळा साकारण्याचा त्यांचा उपक्रम तालुक्यात आदर्श ठरला.
त्यांच्या प्रेरणादायी कार्याची दखल घेत महाराष्ट्र शासनाने ५ सप्टेंबर २०२३ रोजी मुख्यमंत्री एकनाथ शिंदे यांच्या हस्ते “क्रांतीज्योती सावित्रीबाई फुले राज्य शिक्षक गुणगौरव पुरस्कार” प्रदान केला. त्यानंतर इंडिया स्टार इंडिपेंडंट अवॉर्ड २०२४, भारत विभूषण पुरस्कार २०२३, लंडन बुक ऑफ वर्ल्ड रेकॉर्ड सन्मान, तसेच रायगड जिल्हा परिषद आदर्श शिक्षक पुरस्कार २०१९-२० यांसारखे अनेक मान्यतेचे सन्मान त्यांना प्राप्त झाले.
सामाजिक क्षेत्रातही त्यांचे कार्य उल्लेखनीय आहे. डॉ. ए.पी.जे. अब्दुल कलाम इंटरनॅशनल फाउंडेशन, रामेश्वरम चे कोकण विभाग समन्वयक म्हणून त्यांनी २० विद्यार्थ्यांना उपग्रह प्रकल्पात सामावून घेतले. या विद्यार्थ्यांना आंतरराष्ट्रीय प्रमाणपत्रे प्राप्त झाली. ते लायन्स क्लबचे रिजनल सेक्रेटरी म्हणून कार्यरत राहून समाजातील गरजू विद्यार्थ्यांना शालेय साहित्य व सायकल वाटप , नेत्रतपासणी, आरोग्य व रक्तदान शिबिरे अशा उपक्रमांतून मदतीचा हात दिला आहे.
तसेच, त्यांनी केरुनाना – महाराष्ट्राचे आद्य गणितज्ज्ञ व थोर गुरूंच्या जीवनावर आधारित पुस्तक तयार करून इतिहासात हरवलेल्या व्यक्तिमत्त्वास नवसंजीवनी दिली आहे.
वारगे सर सध्या जिल्हा आदर्श शिक्षक संघटना रायगड चे राज्य उपाध्यक्ष, आणि राष्ट्रीय/राज्य पुरस्कार प्राप्त शिक्षक संघटनेचे कोकण विभागीय अध्यक्ष म्हणूनही कार्यरत आहेत.
डॉ. संदीप वारगे सरांचे शिक्षणातील योगदान हे आधुनिकता, मूल्यशिक्षण, आणि सामाजिक बांधिलकी यांचा उत्कृष्ट संगम असून, ते राज्यातील शिक्षकांसाठी एक प्रेरणास्त्रोत ठरले आहेत.
शिक्षकाचा आदर्श प्रवास – डॉ. संदीप वारगे
रायगड जिल्ह्यातील हटाळे येथील जिल्हा परिषद शाळेचे सहाय्यक शिक्षक डॉ. संदीप दत्तात्रेय वारगे यांनी शिक्षणाच्या क्षेत्रात अपूर्व योगदान देत नाविन्यपूर्ण प्रयोग, तंत्रज्ञानाचा प्रभावी वापर आणि सामाजिक भान जपणारे उपक्रम साकारले.
त्यांच्या मार्गदर्शनाखाली १२ विद्यार्थ्यांनी उपग्रह प्रकल्पात सहभाग घेतला, तर २० विद्यार्थ्यांना विज्ञान आणि अंतराळ संशोधनाची गोडी लागली. यामुळेच त्यांना मॅजिक बुक ऑफ रेकॉर्ड फाउंडेशन (हरियाणा) कडून मानद डॉक्टरेट पदवी प्रदान करण्यात आली.
मुख्यमंत्री एकनाथ शिंदे यांच्या हस्ते मिळालेला राज्य शिक्षक पुरस्कार, भारत विभूषण, इंडिया स्टार, लंडन बुक ऑफ वर्ल्ड रेकॉर्ड, आणि अनेक सन्मान त्यांच्या कार्याची पावती आहेत.
शाळेतील डिजिटल प्रयोगशाळा, रोबोटिक्स शिक्षण, ऑनलाईन ओलॅब अशा आधुनिक उपक्रमांमुळे ग्रामीण भागातील विद्यार्थीही जागतिक स्पर्धेला सामोरे जात आहेत.
सामाजिक क्षेत्रातही वारगे सर लायन्स क्लब, डॉ. कलाम फाउंडेशन, व शिक्षक संघटनांतून कार्यरत असून, इतिहासात हरवलेल्या केरुनानांच्या जीवनावर आधारित पुस्तकाचे लेखन त्यांनी केले आहे.
शिक्षक म्हणजे केवळ ज्ञानदाते नव्हे, तर समाज परिवर्तनाचे शिल्पकार असतात, याचे हे ज्वलंत उदाहरण आहे.
