रायगड (प्रतिनिधी) : जिल्ह्यात अंमली पदार्थांच्या तस्करीचे प्रमाण वाढत आहे. मुरुड तालुक्यातील शिळे तपासणी नाका येथे मोठी कारवाई करण्यात आली आहे. या कारवाईदरम्यान लाखोंच्या मुद्देमालासह एक तरुण मुरुड पोलिसांनी अटक केली.
पोलीस सूत्रांनुसार, अलवान निहार दफेकर (वय १९, रा. सिद्धी मोहल्ला, पाण्याच्या टाकीजवळ, दत्त मंदिर रोड, मुरुड) याच्याकडून ३,८८,००० रुपये किंमतीचा चरस आणि २०,००० रुपये किंमतीची सुजुकी मोटारसायकल असा एकूण ४,०८,००० रुपयांचा मुद्देमाल जप्त करण्यात आला आहे.
ही कारवाई शिळे तपासणी नाका येथे रात्री १.१४ वाजता करण्यात आली. संशयिताच्या (MH-48 VK-1251) मोटारसायकलच्या डिकीतून ४४५ ग्रॅम आणि २९ ग्रॅम वजनाचे, खाकी प्लास्टिकमध्ये गुंडाळलेले काळसर हिरवट रंगाचे चरसचे दोन पॅकेट्स सापडले.
या प्रकरणी मुरुड पोलीस ठाण्यात गुन्हा दाखल करण्यात आला असून, पुढील तपास सहाय्यक पोलीस निरीक्षक विजयकुमार देशमुख करीत आहेत. पोलीस हवालदार जनार्दन मोटीराम गवंडळे यांनी सदर माहिती दिली.
रायगड जिल्ह्यातील नागरिकांनी अशा प्रकारच्या तस्करीची माहिती पोलिसांना तत्काळ कळवावी, असे आवाहन स्थानिक पोलीस प्रशासनाने केले आहे.
