अलिबाग (प्रतिनिधी): रायगड जिल्ह्यात सागरी सुरक्षेसाठी कोट्यवधींचा खर्च करूनही डिझेल तस्करीचे सत्र थांबलेले नाही. अलिबाग तालुक्यातील रेवस खाडी परिसरात डिझेल तस्करी करणाऱ्यांविरुद्ध मांडवा पोलिसांनी मोठी कारवाई करत १४.३० लाखांचा मुद्देमाल जप्त केला आहे.
पोलिस अधीक्षक आंचल दलाल यांना खबऱ्यामार्फत डिझेल तस्करीची माहिती मिळाल्यानंतर, त्यांनी जिल्ह्यातील सर्व पोलिसांना सतर्कतेचे आदेश दिले होते. त्यानंतर सहाय्यक पोलीस निरीक्षक दीपक भोई यांच्या पथकाने सापळा रचून ही कारवाई केली.
कारवाईचा तपशीलः
शुक्रवार, ४ जुलै २०२५ रोजी दुपारी साडेबारा वाजता रेवस खाडी परिसरात सापळा रचून ‘समर्थ कृपा (निसर्ग दर्शन)’ या मच्छीमारी बोटीवर छापा टाकण्यात आला. त्यामध्ये ४ लाख रुपये किमतीचे ५ हजार लिटर डिझेल, १५ हजार रुपयांचा होंडा मोटार पंप, १५ हजार रुपयांचा जनरेटर, तसेच १० लाख रुपये किमतीची बोट असा एकूण १४.३० लाखांचा मुद्देमाल जप्त करण्यात आला.
सागरी सुरक्षेवर प्रश्नचिन्ह
डिझेल तस्करी ही मांडवा, रेवदंडा यांसारख्या बंदरांवर खुलेआम सुरू असून, बोटीमार्फत डिझेल किनाऱ्यावर आणले जाते व नंतर गाड्यांद्वारे वितरित केले जाते. यामुळे सागरी सुरक्षेला मोठा धोका निर्माण झाला आहे.
मुंबई बंदरात येणाऱ्या जहाजांमधून देखील डिझेल चोरीचे प्रकार घडत असून, त्यामध्ये जहाज अधिकारी व तस्करांचे संगनमत असते. काहीवेळा बळजबरीने डिझेल लुटले जाते. हे डिझेल स्थानिक मच्छीमार, ट्रकचालक यांच्यामार्फत काळ्या बाजारात विकले जाते.
डिझेल माफिया पुन्हा सक्रिय
पूर्वी महंमद अली आणि चांद मदार हे डिझेल तस्करीत सक्रिय होते. चांद मदार याचा खून झाला आणि महंमद अली टोळीने माघार घेतल्यानंतर नव्या टोळ्या उगम पावल्या. उरण, बेलापूर, अलिबाग तालुक्यातील काही राजकीय पाठबळ असलेले प्रतिनिधी व मच्छीमार बांधव यात सहभागी आहेत. त्यामुळे पोलिस खात्यातील काही अधिकारी याकडे दुर्लक्ष करत आहेत.
या प्रकरणी बीएनएस कलम २८७, ३(५), अत्यावश्यक वस्तू अधिनियम ३, ७, आणि पेट्रोलियम अधिनियम ३२३ अन्वये गुन्हा दाखल करण्यात आला आहे. अधिक तपास मांडवा पोलीस स्टेशनचे सहाय्यक पोलीस निरीक्षक दीपक भोई करत आहेत.
