अलिबाग (प्रतिनिधी) : अलिबाग-पेण मुख्य रस्त्यावर पिंपळभाट परिसरात गेल्या अनेक दिवसांपासून मोठमोठे खड्डे पडल्यामुळे वाहनचालक व प्रवाशांना मोठ्या त्रासाला सामोरे जावे लागत होते. या समस्येकडे प्रशासनाचे दुर्लक्ष होत असताना राष्ट्रवादी युवक काँग्रेसच्या स्थानिक कार्यकर्त्यांनी पुढाकार घेत रस्त्यावरील खड्डे भरून नागरिकांना दिलासा दिला आहे.
राष्ट्रवादी युवक काँग्रेसचे अलिबाग तालुका अध्यक्ष मनोज शिर्के यांच्या नेतृत्वाखाली प्रदीप शेळके, रवींद्र म्हात्रे, पंडितराव ढमढेरे, किशोर खराडे आणि पिंपळभाट येथील रहिवाशांच्या सहकार्याने हे खड्डे भरण्याचे काम पार पडले. स्थानिक युवकांच्या एकजुटीने आणि सामाजिक बांधिलकीच्या भावनेतून ही कृती हाती घेण्यात आली. या कामात पोलीस प्रशासनाचाही मोलाचा सहभाग लाभला.
अनेक वर्षांपासून पिंपळभाट परिसरातील रस्ता खराब अवस्थेत असून वाहनधारकांना तसेच पादचाऱ्यांना मोठा त्रास सहन करावा लागत होता. पावसाळ्यात या खड्ड्यांमुळे अपघातांची शक्यता वाढली होती. स्थानिक नागरिकांनी वेळोवेळी प्रशासनाकडे तक्रार केली होती, मात्र कुठलीही ठोस कारवाई न झाल्यामुळे नागरिकांमध्ये नाराजी होती.
या उपक्रमामुळे स्थानिकांमध्ये समाधानाचे वातावरण असून, कार्यकर्त्यांचे व पोलीस प्रशासनाचे आभार व्यक्त करण्यात येत आहेत. या सामाजिक उपक्रमातून प्रशासनाला जाग येईल आणि भविष्यात कायमस्वरूपी रस्त्याची डागडुजी केली जाईल, अशी अपेक्षा नागरिकांनी व्यक्त केली आहे.
