अलिबाग (प्रतिनिधी): अलिबाग तालुक्यातील 62 ग्रामपंचायतींच्या निवडणुकीसंदर्भात सरपंच पदासाठी नव्याने आरक्षण सोडत जाहीर करण्यात येणार आहे. ही सोडत येत्या 15 जुलै 2025 रोजी सकाळी 11 वाजता रायगड जिल्हाधिकारी कार्यालयाच्या नियोजन भवन सभागृहात घेण्यात येणार असल्याची माहिती अलिबागचे तहसीलदार विक्रम पाटील यांनी दिली आहे.
विशेष म्हणजे, याआधी 22 एप्रिल 2025 रोजी एकदा आरक्षण सोडत जाहीर करण्यात आली होती. मात्र, केवळ काही महिन्यांनंतर पुन्हा एकदा आरक्षण सोडत आयोजित केल्याने स्थानिक राजकीय आणि सामाजिक वर्तुळात आश्चर्य व्यक्त केले जात आहे. यामागचे कारण अद्याप स्पष्ट झाले नसले, तरी यामुळे नवीन आरक्षण प्रक्रियेवर राजकीय दबाव, तक्रारी किंवा कायदेशीर अडथळे असल्याची शक्यता व्यक्त होत आहे.
आरक्षण सोडतीमुळे अनेक गावांतील राजकीय समीकरणे पुन्हा बदलण्याची शक्यता आहे. इच्छुक उमेदवार, ग्रामपंचायत सदस्य आणि राजकीय गट यांच्यात उत्सुकता निर्माण झाली असून, या नव्या सोडतीनंतर निवडणूक रिंगणात कोणते चेहरे दिसतील, याकडे सर्वांचे लक्ष लागले आहे.
जिल्हा प्रशासनाने ही प्रक्रिया पारदर्शक पद्धतीने राबवण्याचे आश्वासन दिले असून, सोडत कार्यक्रमास सर्व इच्छुकांनी उपस्थित राहावे, असे आवाहन करण्यात आले आहे.
