अलिबाग (प्रतिनिधी): अलिबाग-वडखळ मार्गावरील वाहतूक कोंडी ही आता रोजचीच बाब झाली आहे. आठवड्याचे शेवटचे दिवस, सुट्ट्यांचे दिवस तसेच पावसाळ्यात पर्यटनासाठी वाढलेली गर्दी यामुळे या रस्त्यावर अनेक तास वाहनचालकांना अडकून पडावे लागत आहे.
विशेषतः सोमवारी व शनिवार-रविवारी अलिबाग, मुरूड, काशीद, नागाव, रेवदंडा आदी पर्यटनस्थळांकडे जाणाऱ्या आणि तिथून परतणाऱ्या पर्यटकांच्या वाहनांची मोठी गर्दी वडखळ फाट्यापासूनच सुरू होते. परिणामी वडखळ फाटा, झिराड, चित पंप, कोळगाव फाटा, आडिवरे फाटा आणि अलिबाग शहराच्या प्रवेशद्वाराजवळ मोठ्या प्रमाणात वाहतूक खोळंबते.
या मार्गावर रस्त्याचे चौपदरीकरण पूर्णत्वास गेलेले नाही. रस्त्याची दुरवस्था, पावसामुळे झालेली पडझड, अपुऱ्या वाहतूक नियंत्रणाच्या सुविधा आणि सिग्नल व्यवस्थेचा अभाव यामुळे ही कोंडी अधिक गंभीर बनते. अनेक वेळा अर्धा ते दोन तास पर्यंत वाहनचालक वाहतूक कोंडीत अडकतात.
स्थानिक नागरिक, व्यापारी तसेच पर्यटक या वारंवार होणाऱ्या वाहतूक कोंडीमुळे त्रस्त झाले आहेत. पोलिस यंत्रणा प्रसंगी मार्गदर्शन करत असली तरी ती पुरेशी ठरत नाही.
या समस्येवर कायमस्वरूपी उपाययोजना म्हणून रस्त्याचे चौपदरीकरण त्वरीत पूर्ण करणे, अपघातग्रस्त ठिकाणी सुधारणा करणे, पर्यायी मार्गांचा विचार करणे, तसेच वाहतूक नियंत्रणासाठी आधुनिक तंत्रज्ञानाचा वापर करणे गरजेचे आहे. अन्यथा ‘अलिबाग म्हणजे वाहतूक कोंडी’ हीच ओळख निर्माण होईल, अशी भावना नागरिकांमध्ये व्यक्त होत आहे.
