अभिनेत्री अर्चना पाटील यांना निळू फुले स्मृती गौरव पुरस्काराने सन्मान

 अलिबाग (प्रतिनिधी): पेण तालुक्यातील शिर्की गावच्या सुपुत्री आणि मराठी सिने, मालिका व नाट्यक्षेत्रात आपल्या अभिनयाने विशेष ठसा उमटवणाऱ्या अभिनेत्री अर्चना पाटील यांना पुणे येथे निळू फुले स्मृती गौरव पुरस्काराने सन्मानित करण्यात आले. विश्वकर्मा प्रतिष्ठानतर्फे आयोजित कार्यक्रमात विविध मान्यवरांच्या उपस्थितीत शाल, श्रीफळ व आकर्षक स्मृतीचिन्ह देऊन त्यांना गौरवण्यात आले.

अर्चना पाटील यांनी स्टार प्रवाहवरील लक्ष, फुलाला सुगंध मातीचा, तुझे मी गीत गात आहे, आई कुठे काय करते यांसारख्या लोकप्रिय मालिकांमध्ये महत्त्वपूर्ण भूमिका साकारल्या आहेत. त्याशिवाय तू चाल पुढं, नवा गडी नवा राज्य, सण मराठी, पिंगा ग पोरी पिंगा, निवेदिता माझी ताई, जन्मोजन्मी मी आदिशक्ती आदी मालिकांमध्येही त्यांनी दमदार अभिनय सादर केला आहे.

नाटक आणि मराठी चित्रपट डिलिव्हरी बॉय मध्ये देखील त्यांनी लक्षवेधी भूमिका साकारली आहे. त्यांना पेण फेस्टिव्हल बेस्ट स्माईल पुरस्कार, राज्यस्तरीय कलारत्न पुरस्कार, अहिल्याबाई होळकर पुरस्कार आदी सन्मान प्राप्त झाले आहेत.

याशिवाय शंभू मेरा, बाप्पा यो, नाद खुळा, माझा बाप्पा घरी येतो या गाण्यांच्या अल्बम्समध्ये त्यांच्या अभिनय कौशल्याने रसिकांचे मन जिंकले आहे. अर्चना पाटील यांच्या यशस्वी वाटचालीला सलाम!