मुरुड/रोहा : महाराष्ट्राचे लाडके नेते व मुख्यमंत्री देवेंद्र फडणवीस यांच्या वाढदिवसानिमित्त मुरुड आणि रोहा येथे आयोजित करण्यात आलेल्या रक्तदान व आरोग्य तपासणी शिबिरांना उत्स्फूर्त प्रतिसाद लाभला. या उपक्रमाचे आयोजन भारतीय जनता पार्टीच्या वतीने करण्यात आले.
या कार्यक्रमाला भेट देत माजी आमदार व भाजप नेते पंडितशेठ पाटील, भाजप दक्षिण रायगड महिला मोर्चाच्या जिल्हाध्यक्षा चित्रा आस्वाद पाटील, भाजप जिल्हा उपाध्यक्ष सवाई पाटील यांनी सदिच्छा भेट दिली. त्यांनी आयोजक व लाभार्थ्यांशी संवाद साधत या उपक्रमाचे कौतुक केले.
या शिबिरात अनेक नागरिकांनी उत्स्फूर्तपणे सहभाग घेतला. रक्तदान शिबिरात तरुणांनी मोठ्या प्रमाणात सहभाग नोंदवला, तर आरोग्य तपासणी शिबिरात महिलांचा व ज्येष्ठ नागरिकांचा उल्लेखनीय प्रतिसाद होता.
मुख्यमंत्र्यांच्या कार्याची प्रेरणा घेऊन सामाजिक उपक्रमातून जनतेपर्यंत आरोग्यविषयक सुविधा पोहोचवण्याचा हेतू या शिबिरांमागे होता, असे आयोजकांनी सांगितले. या उपक्रमातून जनजागृती घडवण्यास मदत झाली असून भविष्यातही अशा शिबिरांचे आयोजन करण्यात येणार असल्याचेही स्पष्ट करण्यात आले.
