मुंबई (धनश्री रेवडेकर): कल्याणमधील एका खाजगी रुग्णालयात मराठी महिला रिसेप्शनिस्टला मारहाण केल्याप्रकरणी फरार असलेला परप्रांतीय आरोपी गोकुळ झा याला अखेर मनसैनिकांनी पकडले. बुधवारी रात्री उशिरा नेवाळी परिसरातून झा याला ताब्यात घेत, डोंबिवलीच्या मानपाडा पोलीस ठाण्यात नेऊन पोलिसांच्या स्वाधीन करण्यात आले. 
या घटनेमुळे स्थानिक नागरिकांमध्ये संतापाची लाट उसळली होती. मारहाणीनंतर आरोपी फरार झाला होता, मात्र त्याचा शोध घेत मनसे कार्यकर्त्यांनी त्याला शोधून काढले. पोलिसांनी याप्रकरणी गुन्हा दाखल केला असून, आरोपीवर कायदेशीर कारवाई सुरू करण्यात आली आहे.
या घटनेमुळे स्थानिकांच्या सुरक्षेचा प्रश्न पुन्हा ऐरणीवर आला असून, मराठी कर्मचाऱ्यांवर होणाऱ्या हल्ल्यांबाबत मनसेने तीव्र भूमिका घेतली आहे. आरोपीवर कठोर कारवाई करावी, अशी मागणी जोर धरत आहे.
