अलिबाग (प्रतिनिधी): अलिबाग-वडखळ मुख्य रस्ता सध्या अत्यंत खराब स्थितीत असून, प्रवाशांना कंबरदुखी आणि अपघाताचा धोका दोन्ही वाढले आहेत. आधीच वाहतूक कोंडीमुळे हैराण असलेल्या नागरिकांना आता या रस्त्याने अधिक त्रासदायक रूप धारण केले आहे.
रस्त्यावर ठिकठिकाणी पडलेले खोल खड्डे ही मुख्य समस्या ठरत असून, वाहनचालकांना गाड्या चालवताना अक्षरशः तारेवरची कसरत करावी लागत आहे. विशेषतः दुचाकीस्वार आणि जेष्ठ नागरिकांसाठी हा रस्ता जीवघेणा ठरत आहे.
पावसाळ्यात या खड्ड्यांमध्ये पाणी साचल्यामुळे अपघाताचा धोका अधिकच वाढतो आहे. सार्वजनिक बांधकाम विभाग आणि स्थानिक प्रशासन याकडे दुर्लक्ष करत असल्यामुळे नागरिकांतून तीव्र नाराजी व्यक्त होत आहे.
या मार्गाचे तातडीने डागडुजी करून खड्डे बुजवले नाहीत, तर भविष्यात मोठ्या अपघातांना सामोरे जावे लागेल, अशी चिंता स्थानिक नागरिक आणि वाहनचालक व्यक्त करत आहेत. प्रशासनाने तातडीने पावले उचलून रस्ता सुस्थितीत आणावा, अशी जोरदार मागणी केली जात आहे.
