अलिबाग (प्रतिनिधी): गणेशोत्सवाच्या पार्श्वभूमीवर नागरिकांच्या सुरक्षेसाठी आणि गुन्हेगारीविरोधात तातडीने कारवाई करण्यासाठी रायगड पोलिसांनी एक नवा उपक्रम हाती घेतला आहे. ‘रायगड हॅल्प’ नावाचा व्हॉट्सअॅप चॅटबॉट सुरु करण्यात आला असून नागरिकांना त्यांच्या परिसरातील मटका जुगार, अवैध दारू, अमली पदार्थांची विक्री, इतर बेकायदेशीर प्रकारांबाबत तक्रार नोंदवता येईल.
या चॅटबॉटद्वारे नागरिकांना पूर्णपणे गोपनीय पद्धतीने (anonymous) तक्रार करता येणार आहे. यामुळे कोणत्याही प्रकारच्या भीतीशिवाय नागरिक पोलिसांना मदत करू शकतात.
रायगड हॅल्प चॅटबॉटमुळे नागरिकांना पोलिसांकडे थेट तक्रार नोंदविणे सोपे झाले असून, त्या तक्रारीची तात्काळ दखल घेऊन संबंधित विभागीय अधिकाऱ्यांना माहिती पोहोचवली जाईल.
रायगड जिल्हा पोलीस अधीक्षक किशन जावळे यांनी सांगितले की, “गुन्हेगारी आटोक्यात आणण्यासाठी नागरिकांचा सहभाग महत्त्वाचा आहे. रायगड हॅल्पच्या माध्यमातून प्रत्येक नागरिक पोलिसांचा सहकारी ठरू शकतो.”
या उपक्रमाबाबत विविध सामाजिक संस्था, प्रतिष्ठाने, शाळा, महाविद्यालये, महिला मंडळे आदींच्या माध्यमातून जनजागृती केली जाणार आहे.
रायगड पोलिसांनी नागरिकांना आवाहन केले आहे की, रायगड हॅल्पचा जबाबदारीने वापर करावा आणि सुरक्षित, गुन्हेमुक्त रायगड घडवण्यासाठी सहकार्य करावे.
रायगड हॅल्प व्हॉट्सअॅप चॅटबॉट क्रमांक : +91 76200 32931
