पुलाचा काही भाग, रस्त्याची साइडपट्टी कोसळली; वाहतूक पूर्णपणे ठप्प
अलिबाग (खास प्रतिनिधी): अलिबाग तालुक्यातील नांगरवाडी गावाजवळील मुख्य रस्त्यावरील छोटा साकव शनिवारी सकाळी अचानक कोसळला. सकाळी सुमारे सातच्या सुमारास हा प्रकार घडला. सुदैवाने त्या क्षणी पुलाजवळून कोणतेही वाहन जात नव्हते, अन्यथा गंभीर अपघात घडला असता.
घटनेनंतर ग्रामस्थांनी तत्काळ घटनास्थळी धाव घेत रस्ता बंद केला. तसेच रेवदंडा पोलिसांना माहिती दिल्यानंतर पोलिसांनी जागेवर येऊन पाहणी केली. पुलाचा भाग आणि शेजारची साईडपट्टी अजूनही थोड्या-थोड्या प्रमाणात खचत असून धोक्याची स्थिती कायम आहे. ग्रामस्थांनी चिंता व्यक्त करत सांगितले की, लहान वाहन जरी गेलं तरी संपूर्ण साकव कोसळण्याची शक्यता आहे.
या छोट्या साकवावरून दररोज शेकडो दुचाकी व लहान चारचाकी वाहने जात होती. आता हा साकव कोसळल्याने गावकऱ्यांची वाहतूक पूर्णपणे ठप्प झाली असून नागरिकांना मोठ्या गैरसोयीचा सामना करावा लागत आहे.
दरम्यान, यापूर्वीच रोहा रस्त्यावरील नवघर आणि सुडकोली येथील दोन पूल धोकादायक स्थितीत असल्याने अवजड वाहनांची वाहतूक बंद करण्यात आली होती. त्यामुळे नागरिकांना पर्यायी मार्गांचा वापर करावा लागत होता. आता नांगरवाडी नजीकचा पूलही दुर्घटनाग्रस्त झाल्याने संपूर्ण वाहतुकीलाच ब्रेक लागला आहे.
स्थानिकांनी प्रशासनाकडे तातडीने पूल दुरुस्ती व पर्यायी व्यवस्था करण्याची मागणी केली असून, पावसाळ्याच्या दिवसांत हा प्रश्न आणखी गंभीर होण्याची भीती व्यक्त केली जात आहे.
