अलिबाग (प्रतिनिधी) : अलिबाग एस.टी. डेपोच्या गलथान कारभारामुळे प्रवाशांचे हाल होत आहेत. गाडी कधी सुटणार अशी विचारणा करण्यास गेलेल्या प्रवाशांना वेगवेगळी उत्तरे देऊन त्यांची दिशाभूल करण्याचा प्रयत्न आगारात सुरू आहे. हाशीवरे मार्गावरील एस.टी. गाडीला आज पुन्हा एकदा चालक उपलब्ध न झाल्याने गाडी डेपोतच उभी राहिली. परिणामी प्रवाशांना अडचणींचा सामना करावा लागला. गाडी न सुटण्याची कारणे काय तर गाडी सीएनजी भरायला गेली आहे. गाडी वरील चालक आलेला नाही. थांबा पाच मिनिटात सुटेल आशा कारणांची सरबत्ती करून आगारातील नियंत्रक वेळ मारून नेण्याचा प्रयत्न करीत आहेत.
सार्वजनिक वाहतुकीवर अवलंबून असलेल्या ग्रामीण भागातील नागरिकांना या निष्काळजीपणामुळे मोठ्या गैरसोयीचा सामना करावा लागत आहे. दररोजच्या प्रवासासाठी एस.टी.वर विसंबून राहणाऱ्या प्रवाशांची मोठी गैरसोय होत असून, डेपो प्रशासनाकडून याकडे दुर्लक्ष होत असल्याची प्रवाशांमध्ये नाराजी व्यक्त केली जात आहे.
आता अलिबाग आगरातून नियमित हाशिवरेकडे जाण्यासाठीची गाडी गणेशोत्सवाच्या कालावधीत सुटलीच नाही. यामुळे नियमित प्रवासी आणि गणेश भक्तांची प्रवास वेळेत आणि सुखकर होण्याच्या आशा धुळीस मिळाल्या. अलिबाग आगारातील वाहतूक नियंत्रकांनी लवकरात लवकर चालकांची नेमणूक करून नियमित वाहतूक सुरळीत करण्याची मागणी प्रवाशांनी केली आहे.
