राजाभाई केणींच्या प्रयत्नाने कुर्डुस जिप मतदार संघात मोफत आरोग्य तपासणी

अलिबाग (प्रतिनिधी): गरीबातील गरीबाला आरोग्याची मोफत सुविधा देण्यासाठी शिवसेना जिल्हा प्रमुख राजाभाई केणी यांनी पुढाकार घेतला आहे. ‘आरोग्य आपल्या दारी’ या योजनेतून फिरता दवाखान्याची सुविधा गणपतीच्या मुहुर्तावर कुर्डुस मतदार संघात सुरु करण्यात आली असून साधारण १०० आरोग्य चाचण्या मोफत करुन दिल्या जाणार आहेत.

महाराष्ट्राचे उपमुख्यमंत्री एकनाथजी शिंदे आणि अलिबाग-मुरुडचे आमदार महेंद्र दळवी यांच्या मार्गदर्शनाखाली राजाभाई केणी यांनी जिल्हा परिषदेच्या कुर्डुस मतदार संघात ही सुविधा सुरु केली. या मतदार संघातील ९ ग्रामपंचायतींमधील साधारण २५० गावांमधील प्रत्येक नागरिकाची आरोग्य तपासणी करण्याचा संकल्प राजाभाई केणी यांचा आहे. हिंदुहृदय सम्राट बाळासाहेब ठाकरे यांच्या विचारांनी प्रेरीत होऊन ८० टक्के समाजकारण आणि फक्त २० टक्के राजकारण करीत असताना राजाभाई केणी यांनी कुर्डुस मतदार संघात अनेक सामाजिक उपक्रम राबवले आहेत. येथील गावागावांमध्ये रस्ते, पिण्याचे पाणी आणि आता प्रत्येक नागरिकाचे आरोग्य चांगले रहावे यासाठी पुढाकार घेतला आहे. बदलत्या राहणीमानाने ग्रामीण भागातील नागरिकांना वेगवेगळे आजार जडत आहेत. त्यांचे निदान वेळेत होणे गरजेचे आहे. काही लोकांना या खर्चीक तपासण्या करता येत नाहीत. एका एका तपासणीला ५ ते ६ हजार रुपये खर्च करावे लागतात. हा सर्व खर्च आरोग्य आपल्या दारी मोहिमेतून कुर्डुस मतदार संघातील नागरिकांच्या मोफत आरोग्य तपासण्या केल्या जाणार आहेत. गावात येणाऱ्या फिरत्या दवाखान्यात साधारण १०० आरोग्य तपासण्या केल्या जाणार आहेत. वयोवृद्ध, अपंग व्यक्तींना शहरातील रुग्णालयामध्ये जाऊन या तपासण्या करता येत नसत, त्याच तपासण्या आपल्या गावातच मोफत केल्या जात असल्याने येथील अनेक वयोवृद्ध नागरिकांना शिवसेना जिल्हा प्रमुख राजाभाई केणी यांचे आणि कुर्डुस मतदार संघातील शिवसेनेच्या कार्यकर्त्यांचे कौतुक केले आहे.  मतदार संघातील प्रत्येक नागरिकाची आरोग्य तपासणी होईपर्यंत ही मोहिम सुरु राहिल, असे राजाभाई केणी यांनी सांगितले आहे.