रायगड (विशेष प्रतिनीधी): रायगड जिल्ह्यातील काही पुलांवर अवजड वाहन वाहतुकीस बंदीचे आदेश लागू आहेत. मात्र तरीदेखील काही वाहनधारक नियम धाब्यावर बसवून या पुलांवरून अवजड वाहने चालवताना दिसत आहेत. या प्रकारामुळे अपघाताचा धोका वाढण्याबरोबरच पुलांची सुरक्षितता धोक्यात येत असल्याने पोलिस प्रशासनाने गंभीर दखल घेतली आहे.
याबाबत माहिती देताना रायगड जिल्ह्याचे पोलीस अधीक्षक आंचल दलाल यांनी स्पष्ट केले की, “बंदी असलेल्या पुलावरून जर अवजड वाहतूक होत असेल तर संबंधित वाहनचालक व जबाबदारांविरोधात कठोर कारवाई करण्यात येईल. नागरिकांच्या सुरक्षिततेशी कुठल्याही प्रकारे तडजोड केली जाणार नाही. पुलांची स्थिती आणि त्यावरील वाहतूक नियंत्रणात ठेवण्यासाठी योग्य ती उपाययोजना करण्याचा प्रयत्न सुरू आहे.”
सध्या जिल्ह्यातील अनेक ठिकाणी पूल व रस्त्यांची दुरवस्था झाली आहे. काही ठिकाणी वाहतुकीस बंदीचे बोर्ड लावले असले तरीही अनेक वाहनचालक हे नियम तोडून अवजड वाहतूक सुरू ठेवत आहेत. स्थानिक प्रशासन आणि सार्वजनिक बांधकाम विभागाच्या सूचनांकडे दुर्लक्ष करून होणाऱ्या या वाहतुकीमुळे अपघात घडण्याची शक्यता अधिक आहे.
या संदर्भात पोलिसांनी स्थानिक पातळीवर विशेष पथके तयार करून गस्त वाढवण्याचे ठरवले आहे. नियम मोडणाऱ्यांना दंड आकारणे, वाहनं जप्त करणे आणि जबाबदारांविरोधात गुन्हे दाखल करणे अशा कठोर उपाययोजना करण्यात येणार आहेत.
नागरिकांनी स्वतःच्या सुरक्षेसाठी प्रशासनाला सहकार्य करावे, असे आवाहन पोलिस अधीक्षक दलाल यांनी केले. पुलांची क्षमता लक्षात घेऊनच वाहतूक करणे गरजेचे आहे, अन्यथा जीवितहानीसारख्या मोठ्या दुर्घटना होण्याची शक्यता असल्याचा इशाराही त्यांनी दिला.
*************
बंदीचे आदेश असलेल्या पुलावरून अवजड वाहतूक होत असल्यास संबंधितांविरोधात कारवाई केली जाईल. त्यावर योग्य ती उपाययोजना करण्याचा प्रयत्न राहील.
आंचल दलाल, पोलीस अधीक्षक, रायगड
