अलिबाग (प्रतिनिधी): अलिबाग तालुक्यातील चोंढी गावचे सामाजिक कार्यकर्ते व किहीम ग्रामपंचायतीचे सरपंच पिंट्या गायकवाड यांनी गुरुवार, दि. ४ सप्टेंबर रोजी ‘लालबागचा राजा’ गणपतीचे सहकुटुंब व मित्रपरिवारासह दर्शन घेतले. मुंबईतील लालबागच्या राजाचे दर्शन घेणे हे दरवर्षी लाखो भक्तांसाठी श्रद्धेचा व आनंदाचा सोहळा असतो. त्या भाविकांमध्ये सरपंच पिंट्या गायकवाड यांचा समावेश असून, ते स्वतः अनेक वर्षांपासून या मंडळाशी जोडले गेले आहेत.
लालबागच्या राजाचे निस्सीम भक्त म्हणून ओळखले जाणारे गायकवाड यांनी एकेकाळी स्वयंसेवक म्हणून मंडळात सक्रिय सेवा बजावली होती. मंडपात भक्त व्यवस्थापन, रांगेतील शिस्त, तसेच दर्शनासाठी येणाऱ्या भाविकांची सोय-सुविधा यासाठी त्यांनी केलेले योगदान आजही मंडळातील सदस्यांच्या स्मरणात आहे. त्यांच्या या भाविक सेवेमुळेच यंदा लालबागच्या राजा गणेशोत्सव मंडळाने त्यांचा विशेष सत्कार करण्याचा निर्णय घेतला.
दर्शनावेळी मंडळाचे अध्यक्ष सुधीर साळवी व सभासद मुन्नाशेठ नेराळे यांनी सरपंच गायकवाड यांना शाल, श्रीफळ व मानपत्र देऊन सन्मानित केले. यावेळी उपस्थित भाविकांनी टाळ्यांच्या गजरात त्यांचे अभिनंदन केले. गायकवाड यांनी या सत्काराबद्दल कृतज्ञता व्यक्त करताना सांगितले की, “लालबागचा राजा माझ्या आयुष्याचा प्रेरणादायी केंद्रबिंदू आहे. स्वयंसेवक म्हणून सेवा करण्याची संधी मिळाली हे माझे भाग्यच आहे. आज मिळालेला हा मान म्हणजे माझ्यासाठी मोठा आशीर्वाद आहे.”
या प्रसंगी अलिबाग व किहीम परिसरातील काही मान्यवर, मित्रपरिवार तसेच गायकवाड यांचे नातेवाईक उपस्थित होते. भक्तीभाव, सामाजिक कार्य आणि परंपरेच्या संगमातून झालेला हा सत्कार सोहळा गायकवाड यांच्यासाठी स्मरणीय ठरला.
