मुंबई (धनश्री रेवडेकर): राज्यभर गणेशोत्सव थाटामाटात पार पडला असून, पाच व अकरा दिवसांच्या गणेश मूर्तींचे विसर्जन मोठ्या उत्साहात करण्यात आले. मात्र मुंबईची शान आणि कोळी बांधवांचा नवसाचा राजा म्हणून ओळख असलेल्या लालबागच्या राजाचे विसर्जन अद्याप झालेले नाही. समुद्रातील भरती-ओहोटी, पावसाची रिपरिप आणि उसळलेल्या लाटांमुळे विसर्जन प्रक्रिया अडचणीत सापडली आहे.
अनंत चतुर्दशीच्या दिवशी लालबागचा राजा गिरगाव चौपाटीकडे मार्गस्थ झाला. दरवर्षी मुंबईतील मोठ्या गणेश मंडळांची विसर्जन मिरवणूक अनंत चतुर्दशीला निघते आणि रात्री विविध मंडळांचे गणपती विसर्जित होतात. लालबागच्या राजाचे विसर्जन मात्र दुसऱ्या दिवशी पहाटे होते. यंदा विसर्जनासाठी सकाळी आठ वाजता गिरगाव चौपाटीवर पोहोचूनही 27 तास उलटून गेले तरी त्याचे विसर्जन झालेले नाही.
समुद्रात भरती असल्याने विसर्जन प्रक्रियेला अडथळा निर्माण झाला आहे. भरती ओसरून ओहोटी यायला अजून सुमारे तीन तासांचा अवधी असल्याचे सांगण्यात आले. भरती ओसरल्यानंतरच विसर्जन होणार असून, तोपर्यंत प्रतीक्षा करावी लागणार आहे.
यावर्षी विसर्जनासाठी गुजरातवरून अत्याधुनिक स्वयंचलित तराफा मागवण्यात आला आहे. मागील वर्षीच्या तुलनेत हा तराफा दुप्पट मोठा असून पूर्णपणे स्वयंचलित आहे. यापूर्वी विसर्जनासाठी कोळी बांधवांच्या बोटींच्या मदतीने तराफा समुद्रात ओढून न्यावा लागत असे. मात्र नव्या तराफ्यामुळे ही गरज भासणार नाही. हा तराफा समुद्रात 360 अंशांमध्ये कुठेही वळण घेऊ शकतो, ज्यामुळे विसर्जन प्रक्रिया अधिक सोपी, सुरक्षित आणि जलद होणार आहे.
लालबागच्या राजाचे विसर्जन हा केवळ धार्मिक सोहळा नाही, तर मुंबईकरांसाठी एक भावनिक क्षण असतो. यंदा पावसाची रिपरिप आणि समुद्राची उसळलेली लाट यामुळे थोडा उशीर होत असला तरी, नव्या तांत्रिक सुविधेमुळे विसर्जन प्रक्रिया सुरळीत पार पडेल, अशी अपेक्षा व्यक्त केली जात आहे. प्रशासन आणि स्वयंसेवक परिस्थितीवर बारकाईने लक्ष ठेवून असून, भाविकांना संयम राखण्याचे आवाहन करण्यात आले आहे.
