रायगड (खास प्रतिनिधी): सागरी सुरक्षा दल आणि मच्छिमार बांधव यांच्यातील एकोपा आणि खेळाडूवृत्ती वाढविण्यासाठी रायगड जिल्हा पोलीस प्रशासनाकडून “सागरी सुरक्षा दल चषक २०२५” कबड्डी स्पर्धेचे आयोजन करण्यात आले. या स्पर्धेचे उदघाटन रायगड जिल्हा पोलीस अधिक्षक आंचल दलाल यांच्या शुभहस्ते करण्यात आले. कार्यक्रमाला मोठ्या संख्येने पोलीस बांधव, सागरी सुरक्षा दलाचे सदस्य, मच्छिमार आणि स्थानिक नागरिक उपस्थित होते.
कार्यक्रमादरम्यान अधिक्षक आंचल दलाल यांनी सागरी सुरक्षेच्या दृष्टीने कार्यरत असलेल्या दलाचे आणि समुद्रावर अवलंबून असलेल्या मच्छिमार बांधवांचे कौतुक करत, त्यांच्यातील समन्वय अधिक मजबूत करण्याचा संदेश दिला. त्याचबरोबर खेळामुळे संघभावना वाढते, मानसिक आणि शारीरिक स्वास्थ्य राखण्यास मदत होते, असेही त्या म्हणाल्या.
उपस्थित मान्यवरांमध्ये अलिबागच्या पोलीस उपविभागीय अधिकारी माया मोरे, मांडवा सागरी पोलीस ठाण्याचे निरीक्षक सोमनाथ लांडे यांसह दिलीप भोईर, महेश माने, रविंद्र म्हात्रे, अशोक थळे आणि हरेश भोईर यांचा समावेश होता. पोलीस दलातील इतर अधिकारी आणि कर्मचारी मोठ्या उत्साहाने कार्यक्रमात सहभागी झाले.
स्पर्धेच्या माध्यमातून खेळाडूंना आपली कौशल्ये सादर करण्याची संधी मिळणार असून, यामुळे सागरी सुरक्षेच्या क्षेत्रात कार्यरत असलेल्या संघांमध्ये परस्पर सहकार्य वाढण्यास मदत होणार आहे. तसेच खेळामुळे तरुणांमध्ये शिस्त, सहकार्य आणि नेतृत्वगुण विकसित करण्यास चालना मिळेल, असा विश्वास आयोजकांनी व्यक्त केला.
या स्पर्धेच्या यशस्वी आयोजनासाठी सर्व सहभागी आणि आयोजकांचे कौतुक करण्यात आले. रायगड जिल्हा पोलीस प्रशासनाकडून पुढेही अशा खेळ आणि सामाजिक उपक्रमांचे आयोजन करण्याची तयारी दर्शविण्यात आली.
