अलिबाग (प्रतिनिधी): अलिबाग तालुक्यात “छत्रपती शिवाजी महाराज महाराजस्व समाधान शिबिर अभियान सेवा पंधरवडा” अंतर्गत शेत पाणंद रस्त्यांचे सर्वेक्षण करण्यात आले. या पाहणीसाठी माननीय उपविभागीय अधिकारी श्री. मुकेश चव्हाण तसेच तहसीलदार श्री. विक्रम पाटील उपस्थित होते. या उपक्रमाचा उद्देश गावागावातील शेत पाणंद रस्ते मोकळे करून त्यांना शासकीय नोंदवहीत नियमित स्थान मिळवून देणे हा आहे.
अभियानाच्या पहिल्या टप्प्यात गावातील शेत पाणंद रस्ते मोकळे करणे, त्यांना जिओ ट्रेकिंगद्वारे क्रमांक देणे व सर्वेक्षण पूर्ण करणे याबाबत सूचना करण्यात आल्या आहेत. या अंतर्गत अलिबाग तालुक्यातील नऊ महसुली मंडळांमधील प्रत्येकी एका गावाची निवड करून रस्त्यांचे सर्वेक्षण करण्यात आले. अधिकाऱ्यांनी स्वतः मंडळांना भेट देऊन गावातील पाणंद रस्त्यांची पाहणी केली.
सदर सर्वेक्षणावेळी उपअधीक्षक भूमी अभिलेख कार्यालयातील सर्वेअर यांच्या मदतीने पाणंद रस्त्यांचे सीमांकन निश्चित करण्यात आले. त्यानंतर या रस्त्यांची यादी तयार करून ती संबंधित ग्रामसभेत मंजुरीसाठी सादर करण्यात येईल. मंजुरीनंतर ही नोंद गाव नमुना १ फ मध्ये करण्यात येणार असून, गावचा नकाशा व अभिलेख अद्ययावत होणार आहेत.
याशिवाय, पाणंद रस्त्यांवरील अतिक्रमण हटवून रस्ते मोकळे करण्याची कारवाई करण्यात आली आहे. या उपक्रमामुळे शेतकऱ्यांना शेतापर्यंत सहज पोहोचण्यासाठी सुलभ रस्ते उपलब्ध होतील तसेच गाव पातळीवरील भूमिअभिलेख शुद्ध व अद्ययावत राहतील. या सर्वेक्षण उपक्रमामुळे ग्रामीण भागातील रस्ते व्यवस्थापन अधिक पारदर्शक व शाश्वत होईल, अशी अपेक्षा व्यक्त करण्यात येत आहे.
