अलिबाग (प्रतिनिधी): पेझारी चेक पोस्ट ते चरी या गावापर्यंतच्या रस्त्यावर स्ट्रीट लाईट बसविण्याचे महत्त्वाचे काम नुकतेच पूर्ण झाले असून याचा लोकार्पण सोहळा मोठ्या उत्साहात पार पडला. या उपक्रमाची संपूर्ण संकल्पना व अंमलबजावणी भारतीय जनता पार्टीचे ज्येष्ठ नेते माजी आमदार सुभाष उर्फ पंडितशेठ पाटील यांच्या अथक प्रयत्नांमुळे शक्य झाली. ग्रामीण भागातील सुरक्षेच्या दृष्टीने तसेच रात्रीच्या वेळी नागरिकांना सुलभ वाहतुकीसाठी या कामाला ग्रामस्थांनी दीर्घकाळ मागणी केली होती. शेवटी एमआयडीसीमार्फत हे काम पूर्ण करण्यात आले.
स्ट्रीट लाईटच्या लोकार्पणाचा कार्यक्रम भाजप महिला मोर्चा जिल्हाध्यक्ष सौ. चित्राताई पाटील यांच्या शुभहस्ते पार पडला. यावेळी पेझारी ग्रामपंचायतीच्या सरपंच सौ. प्राजक्ता म्हात्रे, सौ. प्रीती पाटील, सौ. मेघा पाटील यांच्यासह ग्रामस्थ मोठ्या संख्येने उपस्थित होते. ग्रामस्थांनी यावेळी या उपक्रमाबद्दल समाधान व्यक्त करून पंडितशेठ पाटील यांचे मनःपूर्वक आभार मानले.
या सोहळ्यात बोलताना मान्यवरांनी सांगितले की, प्रकाश व्यवस्थेमुळे परिसरातील सुरक्षेची हमी वाढेल, तसेच प्रवाशांना आणि विद्यार्थ्यांना रात्रीच्या वेळी मोठा दिलासा मिळणार आहे. गावाचा विकास, सुविधा आणि नागरिकांच्या सुरक्षिततेसाठी सातत्याने प्रयत्न केले जातील, असे आश्वासन यावेळी देण्यात आले.
या कार्यक्रमामुळे गावात उत्साहाचे वातावरण निर्माण झाले असून ग्रामस्थांमध्ये आनंदाचे वातावरण होते. पेझारी–चरी मार्गावर झालेली ही सुविधा ही केवळ सुरुवात असून आगामी काळात आणखी विकासकामे राबवली जातील, अशी अपेक्षा ग्रामस्थांनी व्यक्त केली.
