रायगड (प्रतिनिधी):अलिबाग-वडखळ महामार्गाची दुरवस्था दिवसेंदिवस भीषण होत असून वाहनचालक व प्रवासी पुरते हैराण झाले आहेत. रस्त्यावर मोठमोठे खड्डे पडून त्यामध्ये पावसाचे पाणी साचले आहे. या डबक्यांमधून वाहन हाकताना अपघातांचा धोका निर्माण झाला आहे. त्यामुळे प्रवास केवळ कष्टदायक नव्हे तर जीवघेणा ठरत आहे.
आज एका वाहनचालकाने या डबक्यांमध्ये पोहून अनोखे आंदोलन करत शासनाचे लक्ष वेधले. या आंदोलनाद्वारे संबंधित तरुणाने लोकप्रतिनिधी व शासनाचा निषेध नोंदविला. त्याने प्रवाशांना होणाऱ्या त्रासाकडे लक्ष वेधत तातडीने रस्ता दुरुस्ती करण्याची मागणी केली.
अलिबाग हे प्रसिध्द पर्यटन स्थळ असून येथे देश-विदेशातून पर्यटक मोठ्या संख्येने येतात. मात्र या मार्गावरील खड्डेमय रस्त्यामुळे पर्यटक देखील त्रस्त झाले आहेत. त्यामुळे स्थानिक जनता, पर्यटक व प्रवासी यांचे मोठे नुकसान होत आहे. शासनाने या गंभीर प्रश्नाकडे तातडीने लक्ष देऊन रस्त्याची दुरुस्ती करावी, अशी सर्वसामान्यांची मागणी आहे.
