रायगड(प्रतिनिधी): खड्डेमय रस्त्यांमुळे अपघाताचे सत्र वाढत आहे. या अपघातांमध्ये जखमी होण्याबरोबरच मृत्यूदेखील होवू आहे. अनेकांना कायमचे अपंगत्व निर्माण होत आहे. समस्या गंभीर होऊ लागली आहे. खड्डयांच्या दुरुस्तीकडे प्रशासनासह शासनाने अक्षम्य दुर्लक्ष केले आहे. खड्यांमुळे दीड वर्षात सुमारे तीनशेहून अधिक जणांचा मूत्यू झाल्याची माहिती समोर येत आहे. नागरिकांचा हितासाठी छड्यांविरोधात रस्त्यावर उतरणार असल्याचा इशारा शेकाप राज्य प्रवक्त्या चित्रलेखा पाटील यांनी दिला. मंगळवारी ७ ऑक्टोबरला पेझारी चेक पोस्ट येथे पक्षाच्या वतीने रास्ता रोको केला जाणार आहे, असे त्यांनी सांगितले.
अलिबागमध्ये घेण्यात आलेल्या पत्रकार परिषदेमध्ये त्या बोलत होत्या.
जिल्हा परिषदेच्या अखत्यारित सुमारे पाच हजार किलो मीटरचे रस्ते आहे. जिल्हा परिषदेमार्फत ग्रामीण भागातांचा विकासकेला जातो. परंतु जिल्ह्यातील तीन हजार किलो मीटरच्या रस्त्यांची दुरावस्था झाली आहे. ठिकठिकाणी खड्ड्यांचे साम्राज्य झाले आहे. जिल्हा नियोजन समितीकडून २०२३-२४ मध्ये जिल्हा परिषदेच्या बांधकाम विभागाला रस्त्याच्या ३१६ कामांसाठी ४० कोटी ७१ लाख रुपयांची प्रशासकिय मान्यता दिली होती. त्यापैकी ३८ कोटी १२ लाख रुपयांचा निधी वितरित करण्यात आला. मात्र जून २०२४ आवरेपर्यंत बांधकाम विभागाने रस्त्याच्या दुरुस्तीसह नुतनीकरणासाठी फक्त १६ कोटी रुपयांचा निधी खर्च केला. गतवर्षी करोडो रुपये खर्च करूनही रस्त्यांची अवस्था बिकट आहे. केलेला खर्च पाण्यात गेला आहे. या वर्षी शासनाकडून निधी प्राप्त न झाल्याने जिल्हा परिषद सेस फंडातून प्रत्येक तालुक्याला पाच लाख प्रमाणे ७५ लाख रुपये जिल्हा परिषद बांधकाम विभागाला देण्यात आले. मात्र ग्रामीण भागातील कोणत्या रस्त्याची दुरुस्ती केली असा सवाल उपस्थित केला जात आहे. दुरुस्तीच्या नावाखाली लाखो करोडोचा भ्रष्टाचार होत आहे. सार्वजनिक बांधकाम विभागाच्या अखत्यारित येणारा अलिबाग रोहा, अलिबाग मुरूड, अलिबाग रेवस या रस्त्यांची अवस्थादेखील दयनीय आहे.
विकासाच्या नावाखाली खोदून ठेवलेले रस्तेच गायब झाले आहेत. गणेशोत्सवासह नवरात्रौत्सवही खड्डयातून गेला. मात्र याकडे विद्यमान
आमदारांनी जाणीव पुर्वक दुर्लक्ष केले आहे. सर्वसामान्यांचे प्रचंड हाल होत आहेत.
रस्ते चांगले करतील या विश्वासाने आमदारांना निवडून दिले. परंतु त्यांनी नागरिकांची मोठी घोर निराशा केली आहे. टक्केवारी घेण्यात आमदार मशगूल आहेत. मात्र विकास फक्त कागदावरच अशी परिस्थिती आहे. खड्डे चुकविताना अनेक अप‌घात झाले. या अपघातामध्ये ३००हून अधिक जणांचा मृत्यू झाल्याची माहिती समोर येत आहे. प्रशासनासह शासनाला याबाबत काहीही देणे घेणे नसल्याचे दिसून येत आहे. त्यामुळे ही मनमानी शेकाप म्हणून कदापी सहन करणार नाही. सर्वसामान्यांच्या न्याय हक्कासाठी शेतकरी कामगार पक्ष कायमच पुढे आला आहे. आता सर्वसामान्यांना चांगले रस्ते मिळावे, खड्डेमय रस्त्यांविरोधात शेकाप मार्फत एल्गार पुकारला जाणार आहे. रस्त्यावर उतरून, चक्का जाम करून प्रशासनासह शासनाचे लक्ष वेधण्याचे काम केले जाणार असल्याची माहिती प्रवक्त्या चित्रलेखा पाटील यांनी दिली. मंगळवारी सात ऑक्टोबर रोजी सकाळी नऊ वाजण्याच्या सुमारास अलिबाग वडखळ रस्त्यावरील पेझारी चेक पोस्ट येथे रास्ता रोको करण्यात येणार असल्याचे चित्रलेखा पाटील यांनी सांगितले.
