अलिबाग (प्रतिनिधी): “ना जातीसाठी, ना धर्मासाठी — आता लढू शेतकरी, मच्छीमार, दिव्यांग आणि मेंढपाळ यांच्यासाठी” या ब्रीदवाक्याखाली प्रहार जनशक्ती पक्षाच्या वतीने अलिबाग येथे जिल्हा अध्यक्ष सचिन साळुंखे यांच्या नेतृत्वाखाली भव्य हक्कयात्रा काढण्यात आली. पक्षाचे संस्थापक अध्यक्ष व माजी मंत्री बच्चू कडू यांच्या प्रमुख उपस्थितीत ही हक्कयात्रा उत्साहात पार पडली.
या यात्रेत शेकडो कार्यकर्ते, महिला, दिव्यांग, तसेच ग्रामीण भागातील नागरिकांनी मोठ्या संख्येने सहभाग घेतला. दिव्यांग बांधवांचा सक्रिय सहभाग विशेष लक्षवेधी ठरला. महिलांनी लोकसंगीत, पारंपरिक नृत्य आणि गाण्यांच्या माध्यमातून स्थानिक संस्कृतीचे दर्शन घडवून वातावरण भारावून टाकले.
कार्यक्रमादरम्यान बच्चू कडू यांनी सचिन साळुंखे यांच्या नेतृत्वाचे कौतुक करत, त्यांच्या कार्यतत्परतेची प्रशंसा केली. ते म्हणाले, “हवेत उडणाऱ्या लोकांसाठी चांगले दिवस आले, पण जमिनीवर चालणाऱ्यांचे दिवस बिकट झाले आहेत.” त्यांनी वाढत्या बजेट आणि रस्त्यांच्या वाईट स्थितीवरून सरकारवर तीव्र टीका केली.
शेतकरी, मच्छीमार, दिव्यांग आणि मेंढपाळ यांचे प्रश्न शासनापर्यंत पोहोचवून त्यांना न्याय मिळवून देण्यासाठी प्रहार जनशक्ती पक्ष सदैव कटिबद्ध असल्याचा निर्धार या हक्कयात्रेतून व्यक्त करण्यात आला.
