या अधिवेशनात विद्यार्थ्यांनी MEMS, नॅनोटेक्नॉलॉजी, रीयूजेबल एरोस्पेस व्हेइकल्स, भविष्यातील ऊर्जा, रिमोट सेन्सिंग, आपत्ती व्यवस्थापन आणि संचार नेटवर्क्स अशा अत्याधुनिक विषयांवर नाविन्यपूर्ण प्रकल्प सादर केले. रायगड जिल्ह्याच्या कोकण विभागीय समन्वयक डॉ. संदीप दत्तात्रेय वारगे यांच्या मार्गदर्शनाखाली कामोठे हायस्कूल, जिल्हा परिषद प्राथमिक शाळा हटाळे, रोहा आणि मुरुड येथील १२ विद्यार्थी सहभागी झाले.
शालेय गटातील विद्यार्थ्यांनी “ASL ते स्पीच सेन्सिंग ग्लोव्ह” या अभिनव कल्पनेद्वारे विज्ञानातील सर्जनशीलता दाखवली, तर महाविद्यालयीन गटातून “अंतराळ वेल्डिंगमधील सुधारणा” व “StarSilk” या प्रकल्पांद्वारे संशोधनक्षमतेचा परिचय दिला.
या सर्व प्रकल्पांचे मूल्यांकन ISRO चे वरिष्ठ वैज्ञानिक आणि भारत सरकारच्या विद्यापीठ तज्ज्ञ समितीने केले. स्पर्धेच्या अंतिम फेरीसाठी शालेय व महाविद्यालयीन गटातील प्रत्येकी २० विद्यार्थी पात्र ठरले. याच गटात युनिव्हर्सल ए.आय. युनिव्हर्सिटी, कर्जत येथील द्वितीय वर्षाचे विद्यार्थी अवधूत संदीप वारगे यांनी “टॉप २०” मध्ये स्थान मिळवत रायगड जिल्ह्याचे नाव उज्ज्वल केले.
विजेत्यांना डॉ. निगार शाजी (संचालक आदित्य एल १) आणि डॉ. पी. वीरमुथुवेल (प्रोजेक्ट डायरेक्टर – चांद्रयान–३) यांच्या हस्ते प्रमाणपत्र व सन्मानचिन्ह प्रदान करण्यात आले. तसेच जिल्हा परिषद राज्य आदर्श शिक्षक डॉ. संदीप वारगे यांचा देखील गौरव करण्यात आला.
या वेळी डॉ. एस. एस. अग्रवाल (गुरुग्रामचे शास्त्रज्ञ), डॉ. दिलीप देशमुख, श्री राहुल शहा, श्रीमती विद्या मुथूवल, डॉ. कृष्णा सिंग आदी देशभरातील मान्यवर उपस्थित होते. कार्यक्रमाचे आयोजन मिलिंद चौधरी (जनरल सेक्रेटरी) यांच्या सहकार्याने, डॉ. कलाम यांच्या कुटुंबीयांच्या उपस्थितीत पार पडले.
राज्याच्या युवा व्यवहार व क्रीडा मंत्री मा. रक्षा निखिल खडसे यांनी विद्यार्थ्यांच्या कामगिरीचे विशेष कौतुक केले.
अवधूत वारगे यांनी या यशाचे श्रेय आपल्या कॉलेजमधील प्राध्यापकांचे मार्गदर्शन आणि वडील डॉ. संदीप दत्तात्रेय वारगे यांच्या प्रेरणेला दिले. त्यांचे दोन्ही पालक प्राथमिक शिक्षक आहेत.
“युवकांच्या नाविन्यपूर्ण विचारांतूनच भारताचे भविष्य उज्ज्वल होईल,” हा संदेश या अधिवेशनाद्वारे देण्यात आला. १३ ते १५ ऑक्टोबरदरम्यान पार पडलेल्या या प्रेरणादायी कार्यक्रमाने देशभरातील युवकांच्या संशोधन, विज्ञानप्रेम आणि नाविन्यपूर्ण विचारांना नवी दिशा दिली.
