माथेरान (प्रतिनिधी): माथेरानच्या किंग जॉर्ज व्ह्यू पॉइंटजवळील खोल दरीत बंगळुरुतील सुप्रसिद्ध मोटिव्हेशनल स्पीकर आणि प्राध्यापक षणमुगा एस. बालासुब्रह्मण्यन (वय ५८) यांचे पार्थिव शरीर रविवारी आढळले. त्यांच्या या अकस्मात मृत्यूने अनेक प्रश्न निर्माण केले आहेत.
मिळालेल्या माहितीनुसार, प्रा. बालासुब्रह्मण्यन हे एका कंपनीच्या व्यवस्थापन टीमला मार्गदर्शनासाठी माथेरान येथे आले होते. १५ ऑक्टोबरच्या सकाळी ते हॉटेलमधून बाहेर पडतानाचे दृश्य सीसीटीव्हीमध्ये दिसले होते. त्यानंतर ते बेपत्ता झाले. माथेरान पोलिसांनी शोध मोहिम राबवून सोशल मीडियाद्वारे माहिती गोळा करण्यास सुरुवात केली होती.
शनिवारी स्थानिक आदिवासी नागरिकांना दरीत एक मृतदेह दिसल्याने पोलिसांना कळविण्यात आले. तत्काळ लोणावळ्यातून १७ सदस्यीय गिर्यारोहकांची विशेष टीम बोलावण्यात आली. दोरीच्या सहाय्याने त्यांनी मृतदेह वर आणला.
पोलिस सूत्रांच्या माहितीनुसार, व्ह्यू पॉइंटवरील रेलिंग तुटलेले नसल्याने अपघाती घसरण्याची शक्यता कमी मानली जात आहे. नेमक्या परिस्थितीचा तपास सुरू असून पोलिसांनी या घटनेची नोंद अनपेक्षित मृत्यू म्हणून केली आहे.
लोकप्रिय पर्यटनस्थळ असलेल्या माथेरानमध्ये घडलेली ही घटना पर्यटक आणि स्थानिकांमध्ये चिंतेचा विषय ठरत आहे.
