रायगड (प्रतिनिधी): रायगड जिल्ह्याच्या बहुतांश भागात मंगळवारी संध्याकाळी परतीच्या पावसाने अचानक हजेरी लावली. अलिबाग, पेण, पनवेल, माणगाव, महाड या भागांत पावसाने जोरदार हजेरी लावत नागरिकांना अक्षरशः गारद केलं. दिवाळीच्या पार्श्वभूमीवर बाजारपेठा गजबजलेल्या असताना या अवकाळी पावसामुळे खरेदीदार आणि व्यावसायिकांची मोठी तारांबळ उडाली.
फुलं, फटाके, मिठाई आणि सजावटीच्या वस्तू विक्रीसाठी ठेवलेल्या स्टॉलवर पावसाचे पाणी साचल्याने अनेक ठिकाणी विक्रेत्यांना वस्तू आडोशाला काढाव्या लागल्या. विशेषत: फुलविक्रेते आणि रस्त्यावरील किरकोळ विक्रेत्यांना मोठा फटका बसला. पावसामुळे काही वेळ वाहतुकीवरही परिणाम झाला असून रस्त्यांवर पाणी साचल्याने वाहनचालकांना अडचणींचा सामना करावा लागला.
दिवाळीच्या दोन दिवस आधी आलेल्या या पावसाने नागरिकांच्या आनंदात पाणी फेरलं असलं तरी शेतकऱ्यांसाठी मात्र हा पाऊस काहीसा दिलासा देणारा ठरला आहे. हवामान विभागाने पुढील काही तासांमध्ये जिल्ह्यात ढगाळ वातावरण राहण्याची शक्यता व्यक्त केली असून, नागरिकांना आवश्यक ती काळजी घेण्याचे आवाहन करण्यात आले आहे.
