अलिबाग (प्रतिनिधी): घरफोडी करणारया आंतरराज्‍ टोळीचा रायगड पोलीसांच्‍या स्थानिक गुन्हे शाखेने पर्दाफाश केला आहे. या प्रकरणी पोलीसांनी मोठया शिताफीने कारवाई करत तीन आरोपींच्‍या मुसक्‍या आवळल्‍या आहेत. त्‍यांचे दोन साथीदार अद्याप फरार आहे. शहानवाज कुरेशी, शमीम कुरेशी आणि हिना कुरेशी अशी अटकेत असलेल्‍यांची नावे आहेत तर नौशाद कुरेशी आणि एहसान या दोन साथीदारांची यांचा शोध सुरू आहे. अटक केलेल्‍या आरोपींकडून रायगड, रत्‍नागिरी आणि सातारा जिल्‍ह्यातील 10 गुन्हे उघडकीस आले आहेत. यात 15 लाख 50 हजारांचे सोन्‍याचे दागिने हस्‍तगत करण्‍यात आले आहेत. आरोपींवर रायगड जिल्‍हयासह उत्‍तर प्रदेशात तब्‍बल 23 गुन्हे दाखल आहेत.
या टोळीचा प्रमुख सुत्रधार अटक झाल्‍यानंतर आजारी असल्‍याचे नाटक करीत असे. तपासात चोरीच्‍या मालाची रिकव्‍हरी होवू नये आणि पुढील तपासात प्रगती होवू नये यसाठी तो ही युक्‍ती वापरत होता. अलीकडच्‍या काळात ही टोळी रायगड रत्‍नागिरी आणि सातारा जिल्‍ह्यात चोरया करीत असे आणि शेजारच्‍या जिल्‍ह्यात वास्‍तव्‍याला जात असत. चोरीसाठी ते होंडासीटी गाडी वापरत असल्‍याची माहिती पोलीसांनी दिली.
रायगडच्‍या पोलीस अधिक्षक आंचल दलाल, अपर पोलीस अधिक्षक अभिजीत शिवथरे, स्थानिक गुन्हे शाखेचे पोलीस निरीक्षक मिलींद खोपडे यांच्या मार्गदर्शनाखाली स्थानिक गुन्हे शाखेचे सहायक पोलीस निरीक्षक भास्‍कर जाधव, मानसिंग पाटील, उपनिरीक्षक लिंगाप्‍पा सरगर यांच्‍यासह अमोल हंबीर, प्रतिक सावंत, शाम कराडे, रविंद्र मुंडे, अक्षय पाटील, सचिन वावेकर,अक्षय जाधव रेखा म्‍हात्रे, सुदीप पहेलकर,अक्षय जगताप,मोरेश्‍वर ओमले, लालासाहेब वाघमोडे, बाबासाहेब पिंगळे, ओंकार सोंडकर, आदि कर्मचारयांनी या कारवाईत भाग घेतला.
