अलिबाग (प्रतिनिधी): अलिबाग नगर पालिका निवडणूक महाविकास आघाडीच्‍या माध्‍यमातून लढवण्‍यासाठी आम्‍ही इच्‍छुक आहोत. जागावाटपासंदर्भात शेकाप बरोबर चर्चा सुरू आहे. आमचा योग्‍य सन्‍मान राखला गेला नाही तर स्‍वबळावर लढण्‍याची आमची तयारी आहे असा इशारा शिवसेना संपर्क प्रमुख प्रसाद भोईर यांनी दिलाय. आगामी नगर पालिका निवडणूकीच्‍या पार्श्‍वभूमीवर शिवसेनेने अलिबाग इथं पत्रकार परीषद घेवून आपली भूमिका मांडली.
यावेळी शिवसेना जिल्‍हाप्रमुख सुरेंद्र म्‍हात्रे, सतीश पाटील, तनुजा पेरेकर उपस्थित होते. रायगड जिलहयातील दहा नगर पालिकांमध्‍ये महाविकास आघाडी म्‍हणून लढण्‍याची तयारी आम्‍ही केली आहे. त्‍यासाठी मित्रपक्षांशी वाटाघाटी आणि जागावाटपाची चर्चा सुरू आहे. अलिबागमध्‍ये देखील महाविकास आघाडीचा प्रमुख घटक पक्ष असलेल्‍या शेकापचे नेते माजी आमदार जयंत पाटील यांच्‍याशी चर्चा करण्‍यात आली आहे. शहरात ज्‍या भागात आमचे प्राबल्‍य आहे किंवा ज्‍या ठिकाणी उमेदवार निवडून येवू शकतात अशाच तीन ते चार जागांसाठी आमचा आग्रह आहे. शेकापकडून शिवसेना ठाकरे गटासाठी काही जागा मिळतील असा विश्वास भोईर यांनी व्यक्त केला. मात्र समाधानकारक जागा न मिळाल्‍यास स्‍वबळावर सर्व जागा लढवण्‍याची आम्‍ही तयारी केली असल्‍याचे प्रसाद भोईर यांनी सांगितले.
