अलिबाग(प्रतिनिधी):अलिबाग नगरपरिषदेच्या निवडणुकीचा कार्यक्रम जाहीर होताच शेतकरी कामगार पक्ष, काँग्रेस आणि महाविकास आघाडीने एकत्र निवडणूक लढविण्याचा निर्णय घेतला आहे. त्यानिमित्त रविवारी शेकाप भवनमध्ये झालेल्या बैठकीत आघाडीच्या उमेदवारांची घोषणा करण्यात आली.
महाविकास आघाडीकडून नगराध्यक्षपदासाठी शेकापच्या अक्षया नाईक, तर वॉर्ड क्रमांक ५ मधून काँग्रेसचे समीर ठाकूर आणि वॉर्ड क्रमांक ७ मधून अभय म्हामुणकर यांची उमेदवारी शेकापचे सरचिटणीस जयंत पाटील यांनी जाहीर केली.
या बैठकीला माजी नगराध्यक्ष प्रशांत नाईक, शेकाप प्रवक्त्या चित्रलेखा पाटील, रायगड बाजारचे चेअरमन नृपाल पाटील, ॲड. मानसी म्हात्रे, ॲड. गौतम पाटील, प्रदीप नाईक, काँग्रेसचे राजा ठाकूर, योगेश मगर, प्रभाकर राणे, ॲड. उमेश ठाकूर यांच्यासह आघाडीचे अनेक पदाधिकारी व कार्यकर्ते उपस्थित होते.
उमेदवारांची घोषणा होताच कार्यकर्त्यांनी जल्लोष केला, फटाक्यांची आतषबाजी आणि घोषणांनी शेकाप भवन दणाणून गेले. अक्षया नाईक यांच्या नगराध्यक्षपदाच्या उमेदवारीचे स्वागत पुष्पगुच्छ देऊन करण्यात आले. सामाजिक कार्यात सक्रीय असलेल्या अक्षया नाईक या माजी नगराध्यक्ष प्रशांत नाईक यांची कन्या आहेत.
अलिबाग नगरपरिषदेच्या एकूण २१ जागांसाठी निवडणूक होणार असून, महाविकास आघाडी विजयासाठी सज्ज असल्याचा निर्धार या बैठकीत करण्यात आला.
