रायगड, ता. १२ नोव्हेंबर २०२५
रायगड जिल्ह्यातील विक्रम, मिनिडोअर व टॅक्सी चालक–मालकांच्या प्रलंबित मागण्यांकडे सरकारकडून गेल्या अनेक वर्षांपासून दुर्लक्ष होत असल्याचा आरोप करत चालक–मालकांनी येत्या १९ नोव्हेंबर २०२५ रोजी सकाळी ११ वाजता जिल्हाधिकारी कार्यालयावर धडक मोर्चा काढण्याचा इशारा दिला आहे.
चालक–मालक संघटनेच्या निवेदनानुसार, त्यांच्या मागण्यांबाबत अनेक वेळा आंदोलने, मोर्चे तसेच आत्मदहनाच्या चेतावण्या देऊनही शासन स्तरावर कोणतीही ठोस कार्यवाही झाली नाही. तत्काळीन मुख्यमंत्री मा. एकनाथ शिंदे यांनी १७ मार्च २०२३ रोजी संबंधित अधिकाऱ्यांच्या उपस्थितीत घेतलेल्या बैठकीत १ ते १५ मुद्द्यांवर चर्चा करून योग्य ती कार्यवाही करण्याचे आदेश दिले होते. मात्र, दोन वर्षांहून अधिक काळ उलटूनही त्या आदेशांची अंमलबजावणी झालेली नाही, असा आरोप संघटनेकडून करण्यात आला आहे.
त्यानंतर २२ ऑगस्ट २०२५ रोजी मा. परिवहन आयुक्त यांच्या दालनात झालेल्या बैठकीतही हेच प्रश्न पुन्हा मांडण्यात आले होते. तसेच, १४ ऑक्टोबर २०२५ रोजी मंत्री मा. भरतशेठ गोगावले यांनी या मागण्यांबाबत परिवहन मंत्र्यांकडे बैठक घेण्याची विनंती केली होती. तथापि, अद्याप ती बैठक आयोजित करण्यात आलेली नाही. त्यामुळे शासनाकडून जाणूनबुजून दिरंगाई होत असल्याचा आरोप संघटनेने केला आहे.
प्रमुख मागण्या
- वयोमर्यादा वाढविण्याची मागणी:
ग्रामीण भागातील विक्रम व मिनिडोअर वाहनांची वयोमर्यादा संपल्याने वाहन स्क्रॅप करावी लागत आहे. मात्र, ६+१ बदली वाहन उपलब्ध नसल्याने चालकांचा परवाना रद्द होऊन रोजगारावर गदा येत आहे. त्यामुळे ग्रामीण भागात अशा वाहनांना किमान पाच वर्षांची वयोमर्यादा वाढविण्याची मागणी करण्यात आली आहे. - VLTD उपकरणांचा प्रश्न:
इको टॅक्सी वाहनांना पासिंग करताना ‘व्हेहीकल लोकेशन ट्रॅकिंग डिव्हाईस’ (VLTD) बसविणे सक्तीचे करण्यात आले आहे. यासाठी वाहनधारकांनी मागील वर्षी १० ते १२ हजार रुपये खर्च करून उपकरणे बसविली होती. मात्र, याच उपकरणांना यावर्षी अमान्य ठरवून नवीन उपकरण बसविण्याचा आदेश दिल्याने चालकांची आर्थिक फसवणूक झाल्याचा आरोप करण्यात आला आहे. - व्यवसायावर परिणाम:
शासनाने महिलांना एस.टी. प्रवासात दिलेल्या ५० टक्के सवलतीमुळे प्रवासी संख्या कमी होऊन टॅक्सी व मिनिडोअर चालकांचा व्यवसाय जवळपास बुडीत गेला असल्याचे संघटनेचे म्हणणे आहे.
संघटनेने सरकारला इशारा दिला आहे की, येत्या सात दिवसांत त्यांच्या न्याय्य मागण्यांवर योग्य तो निर्णय न घेतल्यास रायगड जिल्ह्यातील सर्व विक्रम, मिनिडोअर व टॅक्सी चालक–मालक १९ नोव्हेंबर रोजी जिल्हाधिकारी कार्यालयासमोर धडक मोर्चा काढतील. तसेच, सरकारकडून दिरंगाई सुरू राहिल्यास आत्महत्येसारखे टोकाचे निर्णय घेण्याची वेळ चालकांवर येईल, आणि त्याची संपूर्ण जबाबदारी शासन व संबंधित अधिकाऱ्यांवर राहील, असा इशाराही निवेदनात देण्यात आला आहे.
