२६ जानेवारी २०२६ रोजी पंतप्रधान नरेंद्र मोदी यांच्या हस्ते रायगड बँकेचा गौरव
रायगड | केंद्रीय सहकार मंत्रालयाचे संचालक पंकज श्रीवास्तव यांनी गुरुवारी रायगड जिल्हा मध्यवर्ती सहकारी बँकेला भेट देऊन बँकेच्या प्रगतीचा, अंमलात असलेल्या विविध शासकीय योजनांचा आणि नाविन्यपूर्ण उपक्रमांचा सविस्तर आढावा घेतला. केंद्र सरकारच्या अभिनव उपक्रमाअंतर्गत देशातील उत्कृष्ट कामगिरी करणाऱ्या सहकारी बँकांमध्ये रायगड बँकेची निवड झाल्याने त्यांनी विशेष समाधान व्यक्त केले आणि बँकेच्या कार्याची प्रशंसा केली.
तामिळनाडूच्या दौऱ्यानंतर श्रीवास्तव यांनी रायगडचा दौरा केला असून, २६ जानेवारी २०२६ रोजी प्रजासत्ताक दिनी पंतप्रधान नरेंद्र मोदी यांच्या हस्ते रायगड बँकेचा राष्ट्रीय स्तरावर गौरव केला जाणार असल्याचे त्यांनी जाहीर केले. जिल्हा मध्यवर्ती सहकारी बँकांच्या इतिहासातील हा मान महाराष्ट्रासाठी पहिली आणि ऐतिहासिक घटना ठरणार असल्याचे त्यांनी नमूद केले.
उच्चपदस्थ अधिकाऱ्यांची उपस्थिती
या भेटीवेळी नाबार्डचे जिल्हा व्यवस्थापक प्रदीप आपसुंदे, पुणे जिल्हा उपनिबंधक प्रकाश जगताप, रायगडचे उपनिबंधक प्रमोद जगताप, बँकेचे मुख्य कार्यकारी अधिकारी मंदार वर्तक, विभागीय अधिकारी संदेश पाटील, कर्जवसुली प्रमुख डी. एम. जाधव, खालापूर विविध कार्यकारी सहकारी संस्थेचे चेअरमन निलेश घोसाळकर तसेच विविध सहकारी संस्थांचे पदाधिकारी, सभासद आणि अधिकारी उपस्थित होते.
नाबार्ड व केंद्र शासनाच्या योजनांमध्ये रायगड बँकेची अग्रणी कामगिरी
रायगड जिल्हा मध्यवर्ती सहकारी बँकेने नाबार्ड आणि केंद्र शासनाच्या विविध पायलट योजनांची यशस्वी अंमलबजावणी करून देशात अग्रस्थान मिळवले आहे. जिल्हा सहकारी बँक, जिल्हा उपनिबंधक कार्यालय आणि नाबार्ड यांच्यातील उत्कृष्ट समन्वय हा दुर्मिळ आणि अनुकरणीय असल्याचे श्रीवास्तव यांनी विशेषत्वाने नमूद केले.
त्यांनी सांगितले की,
“रायगड बँकेने शासनाच्या योजना प्रभावीपणे राबवून ग्रामीण अर्थव्यवस्थेला सक्षम करण्यासाठी महत्त्वपूर्ण योगदान दिले आहे. या कार्यक्षमतेमुळे रायगड जिल्हा महाराष्ट्रातील आदर्श सहकार मॉडेल ठरला आहे.”
केंद्र शासनाच्या वतीने बँकेला आवश्यक तांत्रिक आणि आर्थिक सहाय्य देण्याचे आश्वासनही त्यांनी दिले.
संवाद व गौरव सोहळा
खालापूर विविध कार्यकारी सहकारी संस्थेचे चेअरमन निलेश घोसाळकर यांनी उपस्थित उच्चपदस्थ अधिकाऱ्यांशी संवाद साधला. नाबार्डचे प्रदीप आपसुंदे यांनी नाबार्डमधील विविध प्रकल्पांची माहिती दिली.
बँकेचे मुख्य कार्यकारी अधिकारी मंदार वर्तक यांनी स्वागत व प्रास्ताविक केले.
यावेळी संस्था संगणकीकरणामध्ये उल्लेखनीय योगदान दिल्याबद्दल अधिकारी योगेश पाटील आणि नेहा पाटील यांचा अतिथींच्या हस्ते सन्मान करण्यात आला.
कार्यक्रमाचे सूत्रसंचालन विभागीय अधिकारी संदेश पाटील यांनी केले.
केंद्रीय सहकार संचालक म्हणजे कोण?
केंद्रीय सहकार संचालक हे केंद्र सरकारच्या सहकार मंत्रालयातील वरिष्ठ अधिकारी असतात. ते सहकार सचिव (Secretary – Ministry of Cooperation) आणि अखेरीस केंद्रीय सहकार मंत्री अमित शहा यांना थेट रिपोर्ट करतात. देशभरातील सहकारी संस्था, सहकारी बँका, त्यांच्याशी संबंधित योजना, धोरणे आणि प्रकल्प यांच्या अंमलबजावणीची देखरेख, मार्गदर्शन आणि मूल्यांकन करण्याची महत्त्वपूर्ण जबाबदारी त्यांच्याकडे असते.
