गावात काही काळ तणावाचे वातावरण निर्माण झाले होते. ग्रामस्थांचे म्हणणे आहे की, त्यांना प्रकल्पाला विरोध नाही; मात्र रस्त्याच्या भूसंपादनासंदर्भात अनेक प्रश्न अद्याप प्रलंबित आहेत. विशेषतः जमिनीचा दर, पुनर्वसनाच्या अटी आणि भरपाई याबाबत समाधानकारक निर्णय व चर्चेअभावी त्यांनी आंदोलनाचा पवित्रा घेतला आहे. “आमच्याशी योग्य चर्चा न करता आणि आमच्या मागण्या मान्य न करता हा रस्त्याचा भराव सुरू करणे चुकीचे आहे. प्रशासनाने प्रथम संवाद साधावा, त्यानंतरच कामाला आमची हरकत राहणार नाही,” असे मत स्थानिक शेतकऱ्यांनी व्यक्त केले.
या आंदोलनाचे नेतृत्व शेकापच्या राज्य महिला आघाडीच्या अध्यक्षा ॲड. मानसी म्हात्रे आणि अनिल पाटील यांनी केले. त्यांच्या म्हणण्यानुसार, ग्रामस्थांना योग्य दर, पुनर्वसनाची हमी आणि कायदेशीर प्रक्रिया पूर्ण होण्यापूर्वी जबरदस्तीने काम सुरू करण्याचा प्रयत्न हा जनतेच्या हक्कांवर गदा आणणारा आहे. त्यांनी प्रशासनाने तातडीने बैठक घेऊन मार्ग काढावा, अशी मागणी केली.
दरम्यान, एमआयडीसीच्या अधिकाऱ्यांनी मात्र प्रकल्पासाठी रस्ता अत्यावश्यक असल्याचे सांगत काम सुरू ठेवण्याचा निर्णय कायम ठेवला आहे. परिस्थिती नियंत्रणात असली तरी गावात अद्याप अस्वस्थता जाणवत आहे.
