रायगड (प्रतिनिधी): रायगड जिल्ह्यात चोरीला गेलेले, गहाळ झालेले किंवा विरसलेले मोबाईल शोधून त्यांचे मुळ मालकांना परत करण्याची प्रशंसनीय कामगिरी रायगड सायबर पोलीस ठाण्याने केली आहे. बुधवारी आयोजित विशेष कार्यक्रमात एकूण 24 नागरिकांना त्यांचे मोबाईल फोन परत देण्यात आले. या मोबाईलची एकत्रित किंमत 3 लाख 47 हजार 500 रुपये इतकी असून, पोलिसांच्या तत्पर तपास कार्यक्षमतेची ही ठोस नोंद मानली जात आहे.
या कार्यक्रमास पोलीस अधीक्षक आंचल दलाल, अपर पोलीस अधीक्षक अभिजीत शिवथरे, सायबर पोलीस ठाण्याचे निरीक्षक नदाफ तसेच सहाय्यक पोलीस निरीक्षक अमोल जाधव उपस्थित होते. पोलीस अधीक्षक आंचल दलाल यांनी या कामगिरीबद्दल सायबर पोलिसांचे कौतुक करताना, मोबाईल हरवलेल्या नागरिकांनी त्वरित जवळच्या पोलीस ठाण्यात संपर्क साधावा किंवा संबंधित अॅपवर ऑनलाईन तक्रार नोंदवावी, असे आवाहन केले.
मोबाईल पुनर्प्राप्ती प्रक्रियेत पोलिस शिपाई श्रेयस गुरव यांनी महत्त्वपूर्ण योगदान दिले. सायबर पोलीस दलाच्या कार्यतत्परतेमुळे अनेक नागरिकांना दिलासा मिळाला असून, वाढत्या सायबर गुन्ह्यांच्या पार्श्वभूमीवर ही कारवाई नागरिकांसाठी आश्वासक ठरत आहे.
