अलिबाग(प्रतिनिधी):अलिबाग नगरपालिका निवडणुकीत शेकापच्या अक्षया नाईक यांना नगराध्यक्ष पदासाठी अधिकृत उमेदवार म्हणून जाहीर करण्यात आल्यानंतर तालुक्यात उत्साहाचे वातावरण पाहायला मिळाले. या पार्श्वभूमीवर मनसे अलिबाग तालुकाध्यक्ष सिद्धू म्हात्रे यांनी आपल्या कार्यालयात विशेष कार्यक्रमाचे आयोजन करून अक्षया नाईक यांचा सत्कार केला. यावेळी तालुकाध्यक्ष म्हात्रे यांनी पक्षाच्या वतीने उमेदवाराला जाहीर पाठींबा देत आगामी निवडणुकीत मनसे मजबूतपणे सोबत असल्याचे सांगितले.
सत्कार सोहळ्याच्या वेळी मनसेचे विविध पदाधिकारी, कार्यकर्ते आणि महिला सभासद मोठ्या संख्येने उपस्थित होते. अक्षया नाईक यांनी पक्षाने दाखवलेल्या विश्वासाबद्दल कृतज्ञता व्यक्त करत, अलिबागच्या विकासासाठी सातत्याने काम करण्याचा संकल्प व्यक्त केला. त्यांनी नागरिकांच्या मूलभूत गरजा, स्वच्छता, पाणीपुरवठा, रस्तेविकास आणि पारदर्शक प्रशासन यांना प्राधान्य देणार असल्याचेही सांगितले. महाराष्ट्र नवनिर्माण सेनेने दाखवलेल्या पाठिंब्याबद्दल मनःपूर्वक आभार मानले.
या कार्यक्रमाने तालुक्यातील मनसे कार्यकर्त्यांना मोठी प्रेरणा मिळाली असून येणाऱ्या निवडणुकीत संघटीतपणे काम करण्याचा निर्धार त्यांनी व्यक्त केला. संपूर्ण कार्यक्रम उत्साहात पार पडला आणि मनसेच्या उमेदवारी घोषणेने अलिबागच्या राजकारणात नवा उत्साह निर्माण झाल्याचे चित्र दिसून आले.
