अलिबाग (प्रतिनिधी): अलिबाग नगरपरिषद निवडणुकीत शेकाप–काँग्रेस आघाडीला मोठा दिलासा मिळाला असून प्रभाग २ब मधील शेकाप उमेदवार आणि माजी नगराध्यक्ष डॉ. प्रशांत नाईक हे बिनविरोध निवडून आले आहेत. भाजपचे संतोष साळुंखे यांनी गुरुवारी (२० नोव्हेंबर) आपले नामनिर्देशन मागे घेतल्याने नाईक यांच्या विजयाचा मार्ग पूर्णतः मोकळा झाला. या निर्णयानंतर शेकाप कार्यकर्त्यांनी शेतकरी भवन येथे जल्लोषात डॉ. नाईक यांचे स्वागत करून त्यांचे अभिनंदन केले.
अलिबाग नगरपालिकेवर गेली तीन दशके शेकापचे वर्चस्व राहिले असून, प्रशांत नाईक यांच्या नेतृत्वाखाली पक्षाने अनेक निवडणुका यशस्वीपणे लढवल्या आहेत. यंदाच्या निवडणुकीतही आघाडीची रणनीती त्यांच्या मार्गदर्शनाखाली राबवली जात आहे. विशेष म्हणजे त्यांच्या मुली अक्षया नाईक या आघाडीच्या नगराध्यक्षपदाच्या उमेदवार आहेत. त्यामुळे नाईक यांचा बिनविरोध विजय आघाडीच्या संपूर्ण उमेदवारांना ऊर्जा व आत्मविश्वास देणारा ठरला आहे.
२ डिसेंबरला होणाऱ्या मुख्य लढतीत शेकाप–काँग्रेस आघाडी आणि भाजप–शिंदे गट युती आमनेसामने येणार आहेत. दरम्यान, नाईक यांच्या बिनविरोध निवडीचे वृत्त शहरात पसरताच त्यांच्या समर्थकांनी प्रत्यक्ष भेटून, तसेच मोबाईलवरून शुभेच्छांचा वर्षाव केला. कार्यकर्त्यांनी याला आघाडीसाठी शुभ संकेत असल्याचे सांगितले.
