रायगड (प्रतिनिधी): रायगड जिल्ह्यातील विविध नगर परिषद व नगरपालिकांच्या निवडणुका २ डिसेंबर २०२५ रोजी होणार आहेत. या पार्श्वभूमीवर जिल्ह्यातील सर्व मतदारांना आदर्श आचारसंहितेचे काटेकोर पालन करण्याचे आवाहन करण्यात आले आहे.
निवडणूक काळात कायदा व सुव्यवस्था राखणे ही जिल्हा पोलीस दलाची महत्त्वाची जबाबदारी असून, पोलीस प्रशासनाला नागरिकांनी स्वयंस्फूर्तीने सहकार्य करावे, अशी विनंती पोलीस अधीक्षक रायगड, आंचल दलाल यांनी केली आहे.
गैरप्रकार, हिंसक कृत्ये, धमकी, पैशांचे वाटप, मद्यविक्री, बेकायदेशीर जमाव, तसेच जातीय किंवा धार्मिक द्वेष पसरवणाऱ्या प्रचारावर कठोर कायदेशीर कारवाई करण्यात येणार असल्याची माहितीही त्यांनी दिली.
लोकशाही बळकट करण्यासाठी नागरिकांनी शांततेत, सुव्यवस्थेत आणि सुरक्षित वातावरणात मतदानाचा हक्क बजावावा, असे आवाहन यावेळी करण्यात आले.
