पेण रायगड तालुक्याला लाचखोरीचे ग्रहण लागले आहे. पेण तालुक्यातील मळेघर ग्रामपंचायतमधील एक अधिकरीदेखील लाचलुचपत विभागाच्या सापळ्यात अडकला आहे. परमेश्वर जाधव वय-४८ वर्ष, असे या लाचखोर अधिकाऱ्याचे नाव आहे.
या घटनेतील तक्रारदार हे वकिल असून त्यांचे आशिलांना कोर्टाच्या कामकाज व MSEB मध्ये सादर करण्यासाठी वडगाव – पेण येथील घराचा असेसमेंट उतारा आवश्यक होता. तो मिळण्याकरिता तक्रारदारांच्या अशीलाने ग्रामपंचायत, मळेघर यांच्याकडे अर्ज केला होता. परंतु अशील वयोवृद्ध असल्याने असेसमेंट कागदपत्र प्राप्त करण्यासाठी तक्रारदारांच्या नावे कुलमुक्त्यार पत्र तयार करून दिले होते.
त्याअनुषंगाने तक्रारदारांनी लोकसेवक परमेश्वर जाधव यांना विचारणा केली असता जाधव यांनी या कामासाठी पाच हजार रुपयांची मागणी केली. तक्रारदारांनी लागलीच नवी मुंबई, लाचलुचपत विभागात तक्रार नोंदवली. प्राप्त तक्रारीनुसार पडताळणी केली असता आरोपी लोकसेवक परमेश्वर सवाईराम जाधव याने ५ हजार लाचेची मागणी केल्याचे निष्पन्न झाले. त्याप्रमाणे लागलीच करण्यात आलेल्या सापळा कारवाईदरम्यान आरोपी लोकसेवक परमेश्वर सवाईराम जाधव याला ५ हजार रुपये लाचेची रक्कम स्वीकारताना रंगेहात पकडण्यात आले. त्याच्यावर भ्रष्टाचार प्रतिबंध अधिनियम कायद्यान्वे गुन्हा दाखल करण्याची पुढील कार्यवाही पेण पोलिस ठाणे येथे सुरू आहे. ही कारवाई सापळा अधिकारी पोलीस निरीक्षक अरुंधती येळवे यांच्यासह त्यांच्या पथकाने केली.
