अलिबाग (प्रतिनिधी): कावीर पंचायत समिती गणातून भारतीय जनता पक्षाकडून निलेश गायकर यांची अधिकृत उमेदवार म्हणून घोषणा करण्यात आली आहे. भाजपच्या या निर्णयामुळे कावीर परिसरातील राजकीय वातावरण चांगलेच तापले असून, कार्यकर्त्यांमध्ये उत्साहाचे वातावरण निर्माण झाले आहे.
निलेश गायकर हे गेल्या अनेक वर्षांपासून सामाजिक आणि राजकीय क्षेत्रात सक्रिय असून, त्यांनी विविध विकासकामांच्या माध्यमातून जनतेशी थेट संपर्क ठेवला आहे. पाणीपुरवठा, रस्ते, शिक्षण, आरोग्य तसेच शेतकरी आणि युवकांच्या प्रश्नांवर त्यांनी सातत्याने आवाज उठवला आहे. त्यांच्या या कामगिरीमुळेच पक्ष नेतृत्वाने त्यांच्यावर विश्वास टाकत अधिकृत उमेदवारी जाहीर केली असल्याचे बोलले जात आहे.
उमेदवारी जाहीर झाल्यानंतर भाजपच्या स्थानिक पदाधिकाऱ्यांनी आणि कार्यकर्त्यांनी गायकर यांचे अभिनंदन केले असून, निवडणुकीच्या तयारीला वेग आला आहे. “कावीर पंचायत समिती गणात विकासाला गती देण्यासाठी आणि सर्वसामान्यांच्या प्रश्नांना प्राधान्य देण्यासाठी आपण ही निवडणूक लढवत आहोत,” असे निलेश गायकर यांनी यावेळी सांगितले.
भाजपकडून संघटनात्मक ताकदीच्या जोरावर प्रचाराची आखणी सुरू असून, महायुतीचे नेते, पदाधिकारी आणि कार्यकर्ते प्रचारात सक्रियपणे सहभागी होणार आहेत. कावीर गणात भाजप आणि इतर पक्षांमध्ये चुरशीची लढत होण्याची शक्यता असून, निलेश गायकर यांच्या उमेदवारीमुळे भाजपची भूमिका अधिक भक्कम झाल्याचे चित्र आहे.
