माणगाव रायगड: रायगड जिल्ह्यामधील माणगावमध्ये भीषण अपघात झाला असून या अपघातात ३ जणांचा जागीच मृत्यू झालाय. रायगडमधील मोर्बा-माणगाव मार्गावर माणगाव उपजिल्हा रुग्णालयासमोरच हा अपघात झाला आहे. भरधाव टेम्पो ट्रॅव्हलरची सायकल, पोलीस जीप आणि दुचाकीला धडक बसली आणि हा भीषण अपघात झाला. अपघातात मृत झालेल्यांमध्ये दोन पुरुष आणि एका महिलेचा समावेश आहे. दिनेश शेलार, विजया शेलार आणि वामन पवार सर्व राहणार माणगाव अशी मृतांची नावं आहेत. दरम्यान या धक्कादायक घटनेचा थरार सीसीटिव्ही कॅमेऱ्यात कैद झाला आहे.
मिळालेल्या माहितीनुसार आज दिनांक ०६ मे रोजी दुपारी भरधाव टेम्पो ट्रॅव्हलर क्रमांक MH 06 BW 9867 ने आधी सायकलला जोरदार धडक दिली नंतर पादचारीला उडवले त्यानंतर एक दुचाकी व पोलीस जीपला जाऊन धडक दिली. उपजिल्हा रुग्णालया समोर रस्त्याच्या कडेने सायकलवरून जात असलेले खांदाड येथील वामन पवार व पाचोळे येथील दिनेश शेलार, दिपीका शेलार यांना जोरदार धडक दिली. या धडकेने वामन पवार व दिपीका शेलार रस्त्याच्या बाजूला उडाले गेले. तर दिनेश शेलार यांना २० फूट फरफटत नेत बेदरकार टेम्पो ट्रॅव्हलर चालकाने गाडी फुटपाथवर चढवत सुकी मच्छिचा व्यवसाय करणाऱ्या दुकानाला जोरदार धडक दिली. बेदरकारपणे वाहन चालवणारा वाहनचालक फुटपाथवर गाडी चढवून घटनास्थळावरून फरार झाला.
नागरिक व पोलिसांनी तत्परता दाखवून तात्काळ अपघातग्रस्तांना उपचारासाठी रुग्णालयात दाखल केले. अपघातानंतर मोठ्या प्रमाणात नागरिकांची गर्दी झाली होती. अपघाताची माहिती कळताच माणगाव पोलीस तात्काळ घटनास्थळी दाखल झाले.
अपघातग्रस्तांना जवळच असलेल्या उपजिल्हा रुग्णालयात उपचारासाठी नेत असताना खांदाड येथील वामन पवार यांना डॉक्टरांनी मृत घोषित केले. त्यांच्या निधनाने सर्वत्र हळहळ व्यक्त करण्यात येत असून खांदाड गावावर शोककळा पसरली आहे.
घटनास्थळी नागरिकांची मोठी गर्दी जमा झाली असून संतप्त जमावाने मुंबई-गोवा महामार्ग माणगाव येथे रोखून धरला आहे. तर आरोपी चालकाला लवकरात लवकर अटक करून कठोर शिक्षा द्यावी, अशी मागणी जोर धरु लागली आहे. रूग्णालय परिसरात मोठी गर्दी झाल्याने मोठा पोलीस बंदोबस्त तैनात करण्यात आला आहे.
गेली ५ दिवस माणगाव शहरात मोठ्या प्रमाणात वाहतुकीची कोंडी होत आहे. सलग चार दिवस सुट्ट्या आणि दि. ५ व ६ मे रोजी एस टी कामगार संघटनेचे अधिवेशन असल्याने वाहतुकीची समस्या आणखीच बिकट झाली होती. तासनतास गाड्या थांबत असल्याने नागरिकांना रस्त्यावरून चालणे अवघड झाले आहे. या अपघाताने सर्वत्र भीतीचे वातावरण पसरले आहे. या अपघाताचा पुढील तपास माणगांव पोलीस करीत आहेत.
