प्रसाद भगत याच्यावर विवाहितेचे गंभीर आरोप
रात्री उशिरा गुन्हा दाखल; कारवाईकडे अलिबागकारांचे लक्ष
अलिबाग रायगड:अलिबागमधील एका विवाहित महिलेचा विनयभंग झाल्याची धक्कादायक घटना शनिवारी दि.10 रोजी घडल्याची तक्रार अलिबाग पोलीस ठाण्यात दाखल झाली आहे. विशेष म्हणजे स्थानिक आमदार यांच्या ड्रायव्हरने विवाहितेच्या घरात घुसून हा प्रताप केला असल्याचे आरोप विवाहितेने केले असल्याचे समजते . या घटनेने परिसरात प्रचंड संताप निर्माण झाला असून संबंधिताविरोधात गुन्हा दाखल करण्यात आला आहे.
प्रसाद अरुण भगत असे या ड्रायव्हरचे नाव असून तो खंडाळे गावातील रहिवासी आहे. अलिबागचे स्थानिक आमदार यांच्या गाडीवर तो गेल्या अनेक महिन्यांपासून चालक म्हणून काम करीत असल्याची माहिती मिळत आहे. महिलेने तक्रारीत म्हंटल्याप्रमाणे, शनिवारी रात्री 36 वर्षीय पीडित महिला तिच्या घरात एकटी असल्याचा फायदा घेत प्रसाद भगत तिच्या घरात घुसला. त्याने महिलेला मागून मिठी मारून तिचा विनयभंग केला. अचानक झालेल्या या गैरप्रकाराबाबत महिलेने आरडाओरड केला. त्यामुळे प्रसादने तिच्या कानाखाली मारून तेथून पळ काढला. विवाहितेवर झालेल्या विनयभंग प्रकरणानंतर स्थानिकांमधून प्रचंड संताप व्यक्त होत आहे. सतत घडणाऱ्या या घटनांमुळे महिला सुरक्षेचा प्रश्न अधिकच गंभीर होऊ लागला आहे. या घटनेनंतर अलिबाग पोलीस ठाण्यात त्याच्या विरोधात रात्री उशिरापर्यंत गुन्हा दाखल करण्याची प्रक्रिया सुरू होती. अखेर गुन्हा दाखल करण्यात आला असून आरोपीवर काय कारवाई होणार याकडे अलिबागकारांचे लक्ष लागले आहे.
