अलिबाग (प्रतिनिधी) : समुद्राशी असलेले नाते अधिक घट्ट करणाऱ्या नारळी पौर्णिमेच्या सणानिमित्त रायगडच्या समुद्रकिनाऱ्यांवर गुरुवारी उत्साहाचे वातावरण पाहायला मिळाले. सागराला नारळ अर्पण करून मच्छिमारांनी मासेमारीच्या नव्या हंगामाचे स्वागत केले. अलिबागसह मुरुड, नागाव, रेवदंडा, नवगाव, श्रीवर्धन आणि उरण परिसरातील समुद्रकिनारे कोळी-आगरी बांधवांच्या गर्दीने फुलून गेले होते.
नारळी पौर्णिमा हा केवळ धार्मिक सण नसून समुद्रावर अवलंबून असलेल्या मच्छिमार समाजासाठी नव्या मासेमारी हंगामाचा प्रारंभ मानला जातो. त्यामुळे सकाळपासूनच समुद्रकिनाऱ्यांवर पूजा-अर्चा आणि विविध धार्मिक विधी पार पडले. सोन्याचा मुलामा दिलेला नारळ सागराला अर्पण करण्यासाठी ढोल-ताशांच्या गजरात आणि पारंपरिक वाद्यांच्या साथीने मिरवणुका काढण्यात आल्या.
एकाच पेहरावात सहभागी झालेल्या कोळी बांधव आणि भगिनींनी पारंपरिक नृत्य सादर करत वातावरणात रंग भरला. समुद्राच्या लाटांसोबत ताल धरत केलेले नृत्य आणि जल्लोष पाहण्यासाठी नागरिकांनीही मोठी गर्दी केली होती.
दरम्यान, विविध ठिकाणी आयोजित करण्यात आलेल्या नारळ फोडीच्या स्पर्धांनी सणाचा उत्साह आणखी वाढवला. तरुणांसह ज्येष्ठांनीही या स्पर्धांमध्ये सहभाग घेतला.
समुद्राला नारळ अर्पण करून मच्छिमारांनी आता पुन्हा खोल समुद्रात जाण्याची तयारी केली आहे. त्यामुळे नारळी पौर्णिमेने रायगडच्या किनारपट्टीवर धार्मिक परंपरेसोबतच नव्या मासेमारी हंगामाचीही मुहूर्तमेढ रोवली.
