रायगड (प्रतिनिधी): पोलिस दलात दीर्घकाळ निःस्वार्थ, प्रामाणिक, कर्तव्यनिष्ठ आणि उल्लेखनीय सेवा बजावल्याबद्दल अलिबागच्या उपविभागीय पोलिस अधिकारी (डीवायएसपी) माया मोरे यांना महाराष्ट्र पोलिस दलाकडून प्रदान करण्यात येणारे प्रतिष्ठेचे ‘अति-उत्कृष्ट सेवा पदक २०२६’ जाहीर झाले आहे. त्यांच्या उल्लेखनीय सेवेला मिळालेल्या या सन्मानामुळे रायगड पोलिस दलात आनंदाचे वातावरण आहे.
माया मोरे यांनी पोलिस सेवेत विविध जबाबदाऱ्या सक्षमपणे पार पाडताना कायदा व सुव्यवस्था राखण्यासोबतच नागरिकांच्या सुरक्षेला आणि त्यांच्या समस्या संवेदनशीलतेने हाताळण्याला प्राधान्य दिले. कर्तव्य बजावताना प्रामाणिकपणा, शिस्त, संवेदनशीलता आणि निर्णयक्षमता या गुणांचा त्यांनी सातत्याने परिचय करून दिला आहे.
अधिकारी म्हणून काम करताना गुंतागुंतीच्या परिस्थितीत शांतपणे आणि तत्परतेने निर्णय घेण्याची त्यांची कार्यपद्धती विशेष उल्लेखनीय ठरली आहे. नागरिकांशी संवाद साधताना संयम आणि संवेदनशीलता जपत त्यांनी पोलिस प्रशासनाविषयी विश्वास निर्माण करण्यासाठी प्रयत्न केले.
कर्तव्याप्रती असलेली निष्ठा, सातत्यपूर्ण कामगिरी आणि प्रभावी नेतृत्वामुळे माया मोरे यांनी पोलिस अधिकारी म्हणून स्वतंत्र ओळख निर्माण केली आहे. त्यांच्या कार्यपद्धतीतून सहकाऱ्यांना प्रेरणा मिळत असून, पोलिस दलातील त्यांच्या योगदानाची दखल घेत महाराष्ट्र पोलिस दलाने त्यांना ‘अति-उत्कृष्ट सेवा पदक २०२६’ जाहीर केले आहे.
या प्रतिष्ठेच्या सन्मानामुळे अलिबागसह रायगड जिल्ह्यातील पोलिस अधिकारी, कर्मचारी आणि नागरिकांकडून माया मोरे यांचे अभिनंदन करण्यात येत आहे.
